Foto: TJM baspasóz qyzmeti
Almaty oblysy Talǵar aýdany Besaǵash aýylynda birneshe úi men áleýmettik nysandy sý basty, dep habarlaidy oblystyq tótenshe jaǵdailar departamenti.
25 naýryzda tolassyz jaýyn-shashynnyń saldarynan Qotyrabulaq ózeni arnasynan shyqqan.
"Besaǵash aýylynda jeti aýla aýmaǵy men meditsinalyq ortalyqty sý basty", - dep jazdy vedomstvo.
Tótenshe jaǵdai mamandarynyń aitýynsha, ózen jaǵasy zańsyz tarylyp, tasyǵan sý arnasynan shyǵyp ketken.
Óitkeni turǵyndar ózenniń arnasyna qorshaýlar men kúrkeler salyp tastaǵan.
"Talǵar aýdanynyń tótenshe jaǵdailar bólimi jergilikti atqarýshy organdarmen birlesip, sý basqan úilerdiń joǵarǵy bóliginde aryq júiesin tereńdetip jatyr. Jumysqa Almaty oblysy TJD jáne jergilikti atqarýshy organdarynan 15 adam, 5 tehnika jáne 2 motopompa jumyldyryldy", - deidi tótenshe jaǵdai mamandary.
Qazirgi ýaqytta sý aǵysy toqtatylǵan. Zań buzǵandar anyqtalyp, ózen arnasy qalpyna keltirilip jatyr.
