Almaty oblysynyń Ile aýdanynda ókpesiniń 90 paiyzy zaqymdanǵan júkti áiel jazylyp shyqty, - dep habarlaidy QazAqparat.
Almaty oblystyq Densaýlyq saqtaý basqarmasy baspasóz qyzmetiniń málimetinshe, em-shara EKMO (Ekstrakorporaldy Membranalyq Oksigenatsiia) apparatyn paidalana otyryp júzege asyryldy. Ile aýdandyq ortalyq aýrýhanasyna júkti kelinshek COVID-19 diagnozymen, ókpesiniń 90 paiyzy zaqymdanǵan kúiinde jetkizilgen bolatyn. Atalǵan aýrhana direktory Baýyrjan Ysqaq Erbozymuly naýqas EKMO apparatynyń kómegimen aman qalǵanyn aitty.
«9 tamyz kúni 27 jastaǵy júkti áiel (38-39 apta) óte aýyr jaǵdaida túsken bolatyn. Aýyr hálde túsken áielge dereý ota jasalyp, bala aman-esen dúniege keldi. Biraq naýqastyń jaǵdaiy nasharlap, qandy ottegimen qanyqtyratyn EKMO apparatyna qosýǵa týra keldi. Naýqas 31 kúnnen keiin ózdiginen dem ala bastady», - dedi Baýyrjan Ysqaq.
4 balanyń anasy Baiansulý Amangeldieva jansaqtaý bóliminde meditsina qyzmetkerleriniń kómegimen qaita aiaqqa turyp, ózdiginen dem alýdy, qozǵalýdy úirengenin aitady.
«Men jansaqtaý bóliminde 47 kún jattym. Eki ai boiy balalarymdy kórý arman boldy. Kópshilik jinalǵan jerde maska taqqan emespin. Bul meniń basty qateligim boldy. Óitkeni maska taqqan kezde ózimdi jaisyz sezinip, aýa jetpei turǵandai sezinetinmin. Alaida bir jutym aýany ózdigimnen juta almai qinalǵanda qatty ókindim. Qateligimniń saldarynan otbasymdy, týǵan-týystarymdy, meniń ómirim úshin eki ai boiy kúresken dárigerlerdi áýrege saldym. Qazir aman-esen jazylyp, otbasyma oraldym. Dárigerlerge alǵysym sheksiz», - dedi Baiansulý Amangeldieva.
Aita keteiik, juqpaly dertke shaldyqqan turǵyn aýrýhanada 58 kún jatsa, sonyń 47 kúnin jansaqtaý bólimshesinde ótkizdi. Ile aýdanyq aýrýhanasyna odan ózge COVID-19 diagnozymen, ókpesi 80 paiyzǵa deiin qabynǵan bes júkti áieldi dárigerler aman alyp qaldy.
