Almaty oblysynda Memleket basshysy Qasym-Jomart Toqaevtyń jýyrda jasaǵan úndeýinde bergen tapsyrmalaryn júzege asyrý baǵytyndaǵy jumystar bastaldy. Bul týraly búgin oblys ákimi Amandyq Batalovtyń tóraǵalyǵymen ótken selektorlyq jiynda belgili boldy, dep habarlaidy óńir basshysynyń baspasóz qyzmeti.
- Kúni keshe ǵana bárimiz Prezidentimiz Qasym-Jomart Toqaevtyń sóilegen sózin yqylas qoiyp tyńdadyq. Óńirge, sonyń ishinde eń bastysy halyqqa osy qiyn kezeńnen qysylmai shyǵýǵa naqty kómek pen qoldaý kórsetý maqsatynda kóptegen sheshimder qabyldanyp, naqty tapsyrmalar berildi. Qazir sol berilgen tapsyrmalardyń bizdiń óńirdegi jergilikti jerlerde sapaly oryndalýy asa mańyzdy. Elimizde jariialanǵan tótenshe jaǵdai kezinde oblysta qabyldanǵan sharalar týraly halyqqa keńinen túsindirý kerek. Qabyldanǵan sharalardyń barlyǵy da oblys halqynyń densaýlyǵy men ómirin saqtaýǵa, qaýipti koronavirýs infektsiiasynyń taralýyn toqtatýǵa baǵyttalyp otyrǵanyn árbir turǵynǵa uǵynyqty jetkizý kerek, - dedi jiyndy ashqan A.Batalov.
Óz sózinde oblys ákimi «Jumyspen qamtý jol kartasy» sheńberinde iske asyrylyp jatqan jobalarǵa toqtaldy.
- Birlesken jumysymyzdyń arqasynda «Jumyspen qamtý jol kartasy» aiasynda júzege asyrýdy josparlaǵan jobalardyń barlyǵy da qoldaýǵa ie boldy. Óńirge 109,2 mlrd. teńge bólindi. Bul óte aýqymdy qarjy, ony tiimdi igerýimiz kerek. Túrli jobalar josparlanǵan aýdandar men qalalardyń ákimderi sol jobalardyń iske asyrylýyna derbes jaýap beretin bolady. Mysaly, osy qarjynyń esebinen biz 7 mektep salýdy josparlap otyrmyz, sonyń 6-ýy árqaisysy 1500 oryndyq jáne 1 mektep 1200 oryndyq bolady. Oǵan qosa 5 aýrýhana salamyz. Degenmen bizdiń basty mindetimiz – baǵdarlamamen ózin ózi jumyspen qamtyǵandardy jáne jumyssyz qalǵan azamattardy qamtý. Sondyqtan da memleket óz azamattaryna kómektesip, qoldaý kórsetý úshin qajetti qarjyny bólip otyr Bul - «Jumyspen qamtý jol kartasynyń» negizgi maqsaty, - dep atap ótti A. Batalov.
Eńbekaqyny turaqty berý máselesi de nazardan tys qalǵan joq:
«Aýdan, qala ákimderi esh jerde jalaqy qaryzynyń bolmaýyn baqylaýda ustasyn. Anyqtalǵan faktiler boiynsha birinshi orynbasarym Lazzat Turlashovpen birge búgin naqty sharalar qabyldap, maǵan esep berýdi tapsyramyn. Bul rette barlyq iri jáne orta kásiporyndardyń jumysy toqtamaýy tiis jáne de olar ónim kólemin azaitpaýy kerek. Eń bastysy, kásiporyndardyń basshylarymen birlesip, jumysshylardyń sol kásiporynnan ary-beri shyqpai jumys isteýine, oblystyń memlekettik bas sanitar dárigeriniń qaýlysynda aitylǵan barlyq uiǵarymdardyń saqtalýyna jaǵdai jasadyq», - dedi A.Batalov.
Jiynda qazirgi kezeńdegi azyq-túlik qaýipsizdigi, áleýmettik mańyzdy taýarlardyń baǵasyn turaqtandyrý, halyqty meditsinalyq maskalarmen qamtamasyz etý máseleleri de kún tártibine qoiylyp, naqty mindetter belgilendi.
- Bul jumysty keshendi túrde sheship, halyqty jeke gigienalyq quraldarmen qamtamasyz etýleriń kerek. Ony kóshede eriktiler tegin taratsyn, shaǵyn jáne orta biznes nysandaryna memlekettik tapsyrys berý arqyly kelisim jasańdar. Taǵy da qaitalap aitamyn, jumystyń nátijeli bolýy árqaisylaryńnyń bul iske qanshalyqty jaýaptylyqpen qaraityndaryńa bailanysty. Memleket tarapynan osyndai aýqymdy qoldaýlar jasalyp jatqanda, qoiylǵan mindetterdiń barlyǵy óz deńgeiinde oryndalýy tiis. Bólingen qarjynyń bári ornymen, tiimdi jumsalýy asa mańyzdy. Onyń nátijesinde eńbekke qabiletti azamattar turaqy jumys oryndarymen qamtylyp, oblystyń infraqurylymy belsendi damytylýy tiis. Oblysta koronavirýstyń taralýyna jol bermeý máselesi turaqty baqylaýda bolsyn. Barlyq shekteý sharalary qatań oryndalýy kerek, - dep sózin qorytyndylady A.Batalov.
