Almaty oblysynda koronavirýs juqtyrýshy 11 adammen qarym-qatynasta bolǵan. Qazir barlyq adamdar oqshaýlanyp, aýrýhanaǵa karatinge jatqyzyldy, dep habarlaidy QazAqparat.
«Almaty oblysynda koronavirýs jaǵdaiy 20 naýryz kúni tirkeldi. Naýqas saǵat 10:45 minýt ketkende Qarasai aýdandyq aýrýhanasyna telefon soǵyp, dene qyzýynyń kóterilgeni jaily habarlaǵan. Sonyń arqasynda saǵat 11:30 minýtta dárigerler infektsiialyq aýrýhanaǵa oqshaýlady. Birden em bastaldy. Búgingi kúnde onyń densaýlyǵy ortasha. Qurǵaq jóteli, kishkene dene qyzýy áli de saqtalady. Onyń júrgen jolyn teksergende, 17 naýryz kúni Saýd-Arabiiasynan Ystambul arqyly Bishkekke ushyp kelgendigi anyqtaldy. Bishkek kedeninen jaiaý ótip, taksimen Almatyǵa kelgen. Takside ózimen birge taǵy 3 azamat bolǵan. Almatyda ony dostary kútip alady. Ol jerde bir kún bolyp, sodan keiin Jambyl oblysyna Shý qalasyna óziniń otbasyna barǵan. Ol jaqta bir kún bolyp, Almaty oblysyna Qarasai aýdanyna kelgen. Qarasai aýdanynda ózi jalǵyz turady. Teksere kele bul adamnyń 11 adammen qarym-qatynasta bolǵany anyqtaldy. Olardyń barlyǵy oqshaýlanyp, aýrýhanalarǵa jatqyzyldy», - dedi Taldyqorǵanda ótken brifnng barysynda Almaty oblystyq Densaýlyq saqtaý basqarmasynyń basshysy Baýyrjan Ysqaq.
Aita keteiik, buǵan deiin QR Densaýlyq saqtaý ministrligi Almaty oblysynda koronavirýs juqtyrýdyń 1 oqiǵasy tirkelgenin habarlaǵan bolatyn. Osy ýaqytta indetke shaldyqqandar sany el boiynsha 53 adamǵa jetti.
