Qazaqstannyń Syrtqy ister ministrligi shetelde júrgen qazaqstandyq azamattardy elge qaitarý máselesin baqylaýda ustap otyr. Bul týraly vedomstvo málimdedi, dep habarlaidy ult.kz.
Ministrliktiń málimetinshe, buǵan deiin BAQ-ta Qazaqstan azamattarynyń Otanyna oralýǵa járdemdesýdi suraǵan ótinishteri taraǵan.
SIM sheteldegi qazaqstandyqtardyń quqyqtary men zańdy múddelerin qorǵaý ministrliktiń negizgi basymdyqtarynyń biri ekenin atap ótti.
Vedomstvo soǵys qimyldary júrip jatqan aimaqtardan qazaqstandyqtardy qaitarý boiynsha tájiribesi bar ekenin aitty. Osyǵan bailanysty azamattar týraly naqty aqparatty BAQ arqyly emes, olardyń ózderinen nemese týystarynan tikelei alýdyń mańyzy zor.
Qazir birqatar otbasy SIM-ge kómek surap júgingen. Soǵys júrip jatqan aimaqtaǵy qazaqstandyqtardyń týystary úshin ministrlikte arnaiy jedel jeli jumys istep tur.
SIM azamattardy anyqtaý jáne quqyqtyq qorǵaý úshin olardyń aty-jóni, týǵan kúni, boljamdy ornalasqan jeri jáne jasasqan eńbek shartynyń talaptary týraly tolyq aqparat qajet ekenin málimdedi.
Sonymen qatar Qazaqstan azamattaryn elge qaitarý jónindegi birlesken sharalardy ázirleý úshin ministrlik Resei tarapymen konsýltatsiialardy jalǵastyryp jatyr.
Búgin Qazaqstannyń Syrtqy ister ministri Reseidiń Qazaqstandaǵy ýaqytsha senimdi ókilimen kezdesti. Al jaqyn arada Qazaqstannyń Reseidegi elshisi Resei Syrtqy ister ministrligi men Qorǵanys ministrliginiń basshylyǵymen kezdesýler ótkizedi.
SIM júrgizilip jatqan jumystyń barysy men nátijeleri týraly qosymsha aqparat beretinin habarlady.
