Astananyń mamandandyrylǵan aýdanaralyq ekonomikalyq soty Qýandyq Bishimbaevtyń anasy Almira Nurlybekovanyń burynǵy kelini Nazym Qaharmanǵa qarsy bergen milliondaǵan teńge kólemindegi talabyna qatysty sheshim shyǵardy, dep habarlaidy ult.kz.
Is materialdaryna sáikes, 2023 jyldyń qarashasynda Almira Nurlybekova Nazym Qaharmanǵa úi-jaiyn 2029 jylǵy 31 qazanǵa deiin senimgerlik basqarýǵa bergen. Kelisim boiynsha múlik senim bildirýshiniń múddesi úshin basqarýǵa tapsyrylǵan.
Nurlybekova sotqa bergen talap aryzynda Nazym Qaharmannyń atalǵan nysandy jalǵa berip, odan tabys alǵanyn, alaida túsken qarajatty ózine aýdarmaǵanyn aitqan. Sondai-aq tolyq esep pen rastaityn qujattar berilmegenin kórsetken.
Talapker jaýapkerden:
- 14 074 771 teńge – shart talaptaryn tiisinshe oryndamaǵany úshin;
- 247 415 teńge – memlekettik baj;
- 800 myń teńge – ókildiń qyzmetine ketken shyǵyndy óndirýdi suraǵan.
Al Nazym Qaharman talap aryzdaǵy soma men ony óndirip alýǵa negizderdiń negizsiz ekenin aityp, talapty qanaǵattandyrýdan bas tartýdy suraǵan.
Sot taraptar usynǵan qujattardy, sonyń ishinde jalǵa alýshylardan túsken qarajat, júrgizilgen tólemder men esep aiyrysýlar týraly málimetterdi zerttegen.
Nátijesinde sot talapty ishinara qanaǵattandyrdy.
Sot sheshimimen Nazym Qaharmannan:
- 6 665 391 teńge;
- 66 654 teńge memlekettik baj;
- 666 539 teńge ókil qyzmetine jumsalǵan shyǵyn óndiriletin boldy.
Qalǵan bóligi qanaǵattandyrylmady. Sot óndiriletin somany esepteý kezinde tek qujatpen rastalǵan, jaýapkerge naqty túsken jáne qaitarylmaǵan nemese senimgerlik basqarý sharty boiynsha kózdelgen shyǵyndarǵa jumsalmaǵan qarajatty eskergen.
Sot sheshimi ázirge zańdy kúshine engen joq jáne oǵan shaǵym berýge bolady.
