Almaty oblystyq politsiia departamenti asa iri mólsherde esirtki zattaryn ótkizý jáne saqtaý boiynsha taǵy bir kúdiktige aiyp taǵylǵanyn málimdedi.
Talǵar aýdanyndaǵy aýyldardyń birinde Almaty oblystyq esirtki qylmysyna qarsy is-qimyl basqarmasynyń qyzmetkerleri jedel izdestirý is-sharalaryn júrgizdi. 54 jastaǵy S. atty azamattan salmaǵy 54.65 gramm esirtki zaty satyp alynyp, qylmysy áshkerelendi.
Atalǵan fakti QR Qylmystyq kodeksiniń 297-baby 1-bóligi «Esirtki zattaryn iri mólsherde zańsyz ótkizý» boiynsha tirkeldi. Qylmystyq is boiynsha sotqa deiingi tergeý barysynda turǵylyqty jerin tintý kezinde kúdikti óz erkimen ózine tán iisi bar ósimdik tektes jasyl tústi usaqtalǵan zaty bar 4 polietilen paket berdi. Budan basqa, «Archibald» qyzmettik-izdestirý itiniń kómegimen negizgi ǵimaratqa japsarlas qurylystardan jedel ýákilder uqsas zaty bar taǵy eki plastmassa bóshkelerdi tapty.
Saraptama qorytyndysyna sáikes, tárkilengen zat esirtki bolyp tabylady. Marihýananyń jalpy salmaǵy – 2 kg. 385 gramm. Atalǵan fakti QR Qylmystyq kodeksiniń 296-baby 4-bóligi boiynsha tirkeldi. Kúdiktige «Esirtki, psihotroptyq zattardy, sol tektesterdi ótkizý maqsatynsyz asa iri mólsherde zańsyz daiyndaý, qaita óńdeý, satyp alý, saqtaý, tasymaldaý» baby boiynsha aiyp taǵyldy. Osy atalǵan baptyń sanktsiiasymen kúdikti úsh jyldan jeti jylǵa deiingi merzimge bas bostandyǵynan aiyrylýy múmkin.
