Foto: skyscrapercity.com
QR Úkimetiniń qaýlysymen 2048 jylǵa deiingi kezeńge Almaty oblysynda aýdany 30 myń ga «G4 City» arnaiy ekonomikalyq aimaǵy (AEA) quryldy, dep habarlaidy "Ult aqparat" primeminister.kz saityna silteme jasap.
"Ekonomikalyq aimaq Almaty qalasynyń soltústiginde, uzyndyǵy – 80 shaqyrym A3 tas jolynyń (Almaty – Qonaev) boiynda ornalasqan, onyń aýmaǵynda arnaiy quqyqtyq rejim belgilenedi. Jańa ekonomikalyq aimaq G4 City integratsiialanǵan qalasyn qurýǵa otandyq jáne sheteldik investitsiialardy tartý úshin qolaily klimat usynady dep kútilýde, bul óz kezeginde búkil aimaqtyń damýyna jańa serpin beredi.
Máselen, 2048 jylǵa deiin AEA sheńberinde shamamen 3,7 trln teńge kóleminde investitsiia tartý, quny 17 trln teńgeden astam qyzmetter men taýarlar óndirý, sondai-aq 60 myńǵa jýyq jumys ornyn qurý josparlanyp otyr. Jalpy jańa ekonomikalyq aimaqtyń qyzmeti G4 City-de týrizm, meditsina, kólik-logistika, bilim berý jáne mádeni-demalys salalary infraqurylymynyń jedel damýyna septigin tigizedi dep kútilýde. Sonymen qatar AEA rejimi nysandardy salýǵa ketetin negizgi shyǵyndardy azaitýǵa múmkindik beredi" - delingen habarlamada.
Eske sala keteiik, G4 City damý tujyrymdamasyna sáikes integratsiialanǵan qala tórt aýdannan turatyn bolady: Gate City – iskerlik jáne qarjylyq ortalyq, Golden District – bilim berý jáne meditsinalyq haby, Growing District – innovatsiialyq-indýstriialyq jáne saýda-logistikalyq aimaq, Green District – týristik klaster. G4 City-de shamamen 2,2 mln adam turady dep boljanýda.
Qaýly qol qoiylǵan kúninen bastap kúshine enedi.
