Foto: KTK siýjeti
Almaty oblysynda eki qabatty úidiń turǵyndary baspanasy apatty jaǵdaida ekenin aityp dabyl qaǵyp otyr. Sebebi, eski jataqhananyń irgetasy úgitilip, sylaǵy opyrylǵan. Bul týraly KTK telearnasy habarlady.
Telearna tilshileriniń málimetinshe, turǵyzylǵanyna 60 jyldan asqan jataqhananyń irgetasy úgitilip, qabyrǵasy qulap jatyr. Turǵyndar bir kúni úiindi astynda qalamyz ba dep qorqady. Kezinde jylý elektr ortalyǵynyń jumysshylary turǵan jataqhana keiin jekemenshikke ótkizilgen eken. Qazir munda ailyǵy-shailyǵyna jetpeitin otbasylar turady.Osylaisha turǵyndar sheneýnikterden kómek suraǵan.
Alaida ákimdik ókilderi "qoldan keler shara joq" dep otyr. Sebebi jekemenshik nysanǵa turǵyndardyń ózi jaýapty eken.
Ótegen batyr aýyl okrýgi ákiminiń orynbasary Maqsat Orynbasarovtyń aitýynsha, jataqhana árkimniń óz ieliginde, ortaq kondominiým múligi.
"Qasbetin jóndeýge qarajat bólinip jatqan joq. Degenmen ony bir túske keltirý úshin tek boiap beredi. Aýdandyq máslihatta sheshim qabyldap. Úilerdiń túri bir tús bolýy úshin. Aqsha bólýge aýdannyń turǵyn úi kommýnaldyq-sharýashylyq bólimi quqyly, biraq búginde aqsha bólingen joq", - deidi ol.
Ákimniń orynbasary turǵyndardyń ózi jataqhanaǵa saraptama jasatsyn dep keńes berdi. Eger sonyń qorytyndysy boiynsha úi apatty dep tanylsa, is ári qarai jylji bastaidy deidi.
