فوتو: كتك سيۋجەتٸ
الماتى وبلىسىندا ەكٸ قاباتتى ٷيدٸڭ تۇرعىندارى باسپاناسى اپاتتى جاعدايدا ەكەنٸن ايتىپ دابىل قاعىپ وتىر. سەبەبٸ, ەسكٸ جاتاقحانانىڭ ٸرگەتاسى ٷگٸتٸلٸپ, سىلاعى وپىرىلعان. بۇل تۋرالى كتك تەلەارناسى حابارلادى.
تەلەارنا تٸلشٸلەرٸنٸڭ مەلٸمەتٸنشە, تۇرعىزىلعانىنا 60 جىلدان اسقان جاتاقحانانىڭ ٸرگەتاسى ٷگٸتٸلٸپ, قابىرعاسى قۇلاپ جاتىر. تۇرعىندار بٸر كٷنٸ ٷيٸندٸ استىندا قالامىز با دەپ قورقادى. كەزٸندە جىلۋ ەلەكتر ورتالىعىنىڭ جۇمىسشىلارى تۇرعان جاتاقحانا كەيٸن جەكەمەنشٸككە ٶتكٸزٸلگەن ەكەن. قازٸر مۇندا ايلىعى-شايلىعىنا جەتپەيتٸن وتباسىلار تۇرادى.وسىلايشا تۇرعىندار شەنەۋنٸكتەردەن كٶمەك سۇراعان.
الايدا ەكٸمدٸك ٶكٸلدەرٸ "قولدان كەلەر شارا جوق" دەپ وتىر. سەبەبٸ جەكەمەنشٸك نىسانعا تۇرعىنداردىڭ ٶزٸ جاۋاپتى ەكەن.
ٶتەگەن باتىر اۋىل وكرۋگٸ ەكٸمٸنٸڭ ورىنباسارى ماقسات ورىنباساروۆتىڭ ايتۋىنشا, جاتاقحانا ەركٸمنٸڭ ٶز يەلٸگٸندە, ورتاق كوندومينيۋم مٷلٸگٸ.
"قاسبەتٸن جٶندەۋگە قاراجات بٶلٸنٸپ جاتقان جوق. دەگەنمەن ونى بٸر تٷسكە كەلتٸرۋ ٷشٸن تەك بوياپ بەرەدٸ. اۋداندىق مەسليحاتتا شەشٸم قابىلداپ. ٷيلەردٸڭ تٷرٸ بٸر تٷس بولۋى ٷشٸن. اقشا بٶلۋگە اۋداننىڭ تۇرعىن ٷي كوممۋنالدىق-شارۋاشىلىق بٶلٸمٸ قۇقىلى, بٸراق بٷگٸندە اقشا بٶلٸنگەن جوق", - دەيدٸ ول.
ەكٸمنٸڭ ورىنباسارى تۇرعىنداردىڭ ٶزٸ جاتاقحاناعا ساراپتاما جاساتسىن دەپ كەڭەس بەردٸ. ەگەر سونىڭ قورىتىندىسى بويىنشا ٷي اپاتتى دەپ تانىلسا, ٸس ەرٸ قاراي جىلجي باستايدى دەيدٸ.
