Foto: IIM baspasóz qyzmeti
Almaty oblysynyń politsiia qyzmetkerleri eki adamdy óltirdi degen kúdikke ilingen sheteldik azamatty ustady, - dep habarlaidy "Ult aqparat" IIM baspasóz qyzmetine silteme jasap.
Esterińizge sala keteiik, 26 maýsymda Qarasai aýdanynyń PB-ǵa jeke úilerdiń birinen pyshaq jaraqaty bar eki er adamnyń máiiti tabylǵandyǵy týraly habarlama kelip túsken.
"Tabylǵan adamdar 30 ben 34 jastaǵy Tájikstan Respýblikasynyń azamattary bolǵandyǵy anyqtaldy. Osy qylmystyq quqyq buzýshylyqty jasady degen kúdikke 43 jastaǵy sol respýblikanyń azamaty ilindi. Jedel-izdestirý is-sharasy barysynda politsiia qyzmetkerleri kúdiktiniń ornalasqan jerin anyqtap, ony ustady. Qazirgi ýaqytta ol ýaqytsha ustaý izoliatoryna qamaqqa alyndy, - dedi Almaty oblysy PD bastyǵy Baýyrjan Álenov.
Is negizinde sot-meditsinalyq saraptama taǵaiyndaýmen sotqa deiingi tergeý amaldary júrgizilip jatyr. Tergeý múddesi úshin ózge aqparat jariia etilmeidi.
