Almaty oblysy Panfilov aýdanynda dala órtin sóndirý kezinde 3 adam qaza tapty, 7 adamdy túrli dárejede kúiik shaldy. Bul týraly Qazaqstan Respýblikasy Ishki ister ministrliginiń baspasóz qyzmetinen habarlady.
«Almaty oblysy Panfilov aýdany Taldy aýyldyq okrýginiń aýmaǵyndaǵy taýly jerlerde dala órtin sóndirý kezinde 3 adam qaza tapty. Onyń bireýi - Jarkent orman sharýashylyǵy mekemesiniń qyzmetkeri, qalǵan ekeýi órtti óz kúshterimen sóndirýge tyrysqan jergilikti turǵyndar. Sonymen qatar 7 adam túrli dárejedegi kúiik aldy, onyń ishinde 1 adam aiaǵyn syndyrdy. Zardap shekkender Lesnovka aýylyna tikushaqpen jetkizildi, olar odan ári Jarkent qalasynyń ortalyq aýdandyq aýrýhanasyna jatqyzylady», delingen habarlamada.
Oqiǵa ornynda Almaty oblysynyń TJD men Politsiia departamentiniń jeke quramynan 59 adam, 13-ten astam arnaiy tehnika, sondai-aq Jarkent memlekettik orman mekemesiniń qyzmetkerleri jumys isteýde. Órt oshaǵyn sóndirýge órt sóndirýshiler jáne politsiia qyzmetkerlerimen birge jergilikti turǵyndar, sondai-aq orman sharýashylyǵy qyzmetkerlerinen qurylǵan erikti órtke qarsy qurylymdar jumyldyryldy.
«Taýly jerdegi órtti sóndirý qiyndyq týǵyzýyna bailanysty sýaǵar qurylǵysy bar MI-8 tikushaǵy tartyldy. Jaqyn mańda sý alatyn aidyn-kól bolmaǵandyqtan, áýe kemesi adamdardy tasymaldap, qorjyndy búrikkishterdi sýmen qamtamasyz etý úshin jumys istedi. Tabiǵi apatpen kúres asa qiyn jaǵdaida ótti. Kúrdeli meteojaǵdaida ainalanyń kórinýi nashar boldy, órt sóndirýshilerge birneshe ese dene kúshin jumsaýǵa týra keldi», - dep atap ótilgen Qazaqstan Respýblikasy IIM baspasóz qyzmetiniń habarlamasynda.
Qazirgi ýaqytta órtti sóndirý boiynsha jumystar jalǵasýda. Órt oshaqtaryn oqshaýlaý úshin qosymsha kúshter men quraldar tartyldy. Oqiǵa ornyna taǵy bir «Qazaviaqutqarý» tikushaǵy jiberildi.
«Jaǵdai qatań baqylaýda. Ishki ister ministrligi Tótenshe jaǵdailardy joiý kezinde qaza tapqan jáne zardap shekkenderdiń otbastaryna kóńil aitady», delingen IIM habarlamasynda.
