Almaty oblysynyń ákimi Marat Sultanǵaziev birneshe aýdan ákiminiń orynbasarlaryna sógis jariialady, - dep habarlaidy Tengrinews.kz agenttigi óńir basshysynyń baspasóz qyzmetine silteme jasap.
Otyrys barysynda ákim jer telimderin berýdiń zańdylyǵy máselesin kóterdi. Baspasóz qyzmeti málimetinshe, oblystyń úsh aýdanynda jer telimderiniń nysanaly maqsatyn ózgertý deregi bar.
"Osylaisha, Ile aýdanynda úsh jer teliminiń nysanaly maqsaty sharýa qojalyǵynan óndiristik nysanǵa aýystyrylǵan. Osyǵan uqsas eki fakt Eńbekshiqazaq aýdanynda, taǵy eki fakt Qonaev qalasynda tirkelgen", - delingen habarlamada.
Sultanǵaziev aýyl sharýashylyǵy jerlerin segmentteýge jáne keiinnen nysanaly maqsatyn ózgertýge jol berilmeitinin málimdegeni aityldy.
"27 maýsym men 1 shilde aralyǵynda oblysta 7,5 myń gektar aýmaqta 578 jer ýchaskesi berildi. Aldymyzda jer telimderin qoldanystaǵy zańnama talaptaryna sáikes retke keltirý mindeti tur. Jeke turǵyn úi qurylysy úshin jer ýchaskeleri bekitilgen qala qurylysy qujattamalarymen qamtamasyz etilgen ýchaskelerde berilýi kerek", - dedi ákim.
Anyqtalǵan derekterdi eskere otyryp, oblys ákimi bólingen ýchaskelerdiń zańdylyǵyna taldaý júrgizip, aýdan ákiminiń jer qatynastaryna jetekshilik etetin orynbasarlaryna sógis jariialaýdy tapsyrdy, dep tolyqtyrdy baspasóz qyzmeti ókilderi.
