Búgin Almaty oblysynda koronavirýs infektsiiasynan 9 adam emdelip shyqty. Onyń ishinde bes bala - 2 men 10 jas aralyǵynda, dep habarlaidy "Ult aqparat" oblys ákiminiń baspasóz qyzmetine silteme jasap.
Jazylyp shyqqan patsientterdiń biri Kerbulaq aýdanynyń turǵyny. Eldimekenniń 34 jastaǵy turǵyny, júkti áiel úsh balasymen indetten saýyqty. Sondai aq Eńbekshiqazaq aýdanynyń 22 jáne 29 jastaǵy aǵaiyndy turǵyndary da koronavirýstan jazyldy.
Sonymen qatar, emdelgender qatarynda 29 jastaǵy kelinshek pen bir otbasynyń eki balasy da bar. Olar Eńbekshiqazaq aýdanaralyq kópsalaly aýrýhanada 16 sáýirden bastap em alǵan bolatyn.
Eńbekshiqazaq aýdanaralyq kópsalaly aýrýhananyń bas dárigeri Jámila Ábeýova júkti áieldiń jaǵdaiy ortasha aýyr bolǵanyn aitady.
«34 jastaǵy júkti áiel aýrýhanaǵa pnevmoniia diagnozymen túsken edi. Jaǵdaiy ortasha aýyr boldy. Dárigerler júkti áieldi qatań baqylaýda ustady. Júkti áieldiń úsh balasynan koronavirýs eki kúnnen keiin anyqtaldy. Balalarǵa belgili algoritm boiynsha em júrgizildi. Eńbekshiqazaq aýdanynan tirkelgen eki bala da bir otbasynyń balalary. Qazirgi ýaqytta barlyǵynyń densaýlyǵy jaqsy. Alańdaýǵa esh negiz joq», - dedi bas dáriger.
Eńbekshiqazaq aýdanaralyq kópsalaly aýrýhanada emdelgen 9 patsientke 3 mamyr kúngi jasalǵan qaita taldaý nátijesi teris ekenin kórsetti.
Jalpy, Almaty oblysynda koronavirýstan jazylǵan adamdardyń sany 39-ǵa jetti.
