Foto: Pexels.com
Almaty oblysynyń prokýratýrasy Qylmystyq kodekstegi jańa 232-1-bap («Dropperlik áreket») boiynsha alǵash ret sotqa deiingi tergeýdi bastady, dep habarlaidy Ult.kz.
Vedomstvonyń málimetinshe, Eńbekshiqazaq aýdanynyń turǵyny alaiaqtarǵa deldal bolǵany anyqtalǵan. Ol OLX saityndaǵy “onlain-tólemder operatory” týraly jalǵan habarlandyrýǵa senip, óz bank kartasyn qylmystyq toptyń paidalanýyna bergen.
Sonyń nátijesinde qyrkúiek aiynan bastap onyń shotyna 2 mln teńgeden astam qarjy túsken. Áiel adam onyń 5 paiyzyn «komissiia» retinde alyp otyrǵan, al qalǵan soma alaiaqtardyń shottaryna aýdarylǵan.
Prokýratýra bul shemanyń alaiaqtar arasynda keń taralǵanyn atap ótti. Olar urlanǵan qarajatty tez qolma-qol etý úshin bank kartalaryn berýge daiyn adamdardy izdeidi. Endi zańǵa engizilgen ózgerister boiynsha, tek alaiaqtardyń ózderi ǵana emes, olardyń «dropper» qyzmetin atqarǵan adamdar da qylmystyq jaýapqa tartylady.
Qazir Eńbekshiqazaq aýdandyq politsiia basqarmasy barlyq qajetti tergeý amaldaryn júrgizip jatyr.
2025 jylǵy 16 qyrkúiekten bastap «dropperlik» áreket úshin 7 jylǵa deiin bas bostandyǵynan aiyrý jazasy qarastyrylǵan. Jaýapkershilik óz rekvizitterin bóten adamdarǵa erikti túrde beretinderge de, ózgeniń bank kartalaryn satyp alatyn nemese paidalanatyn adamdarǵa da qoldanylady.
Prokýratýra azamattarǵa bank kartalary men PIN-kodtaryn, loginderi men qupiiasózderin bógde adamdarǵa bermeýdi jáne kúmándi saittarda jeke málimetterdi engizbeýdi eskertti.
