Foto: almaty.tv
Almaty oblysynda sibir jarasynyń 80-nen asa oshaǵy tabyldy. Juqpaly aýmaqtar turǵyn úiler men balabaqshalarǵa jaqyn ornalasqan. Turǵyndar densaýlyǵyna alańdap otyr, - dep habarlaidy Tengrinews.kz saity Almaty.tv telearnasyna silteme jasap.
Jambyl aýdanyndaǵy aýyldardyń birinde sibir jarasynan ólgen mal kómilgen jer mańynda 75 oryndyq balabaqsha ornalasqan. Turǵyn úiler odan da jaqyn ornalasqan. Jergilikti turǵyndar indetten qorqyp otyr jáne bilikten infektsiia oshaǵyn joiýdy birneshe ret suraǵan.
Almaty oblysynda barlyǵy 87 osyndai qorym bar. Olarǵa aýrý janýarlar nemese basqa infektsiia tasymaldaýshylar óleksesi kómiledi. Olardyń kez kelgeni infektsiia kózi bola alady. Qaýiptengen turǵyndar olardy eldi mekenderden alystatýdy talap etip otyr.
"Balalar júr, qarańyzdar. Men munda balalardy talai ret kórdim. Olardyń infektsiia juqtyrmaitynyna kepildik qaida? Jappai taramaitynyna? Balalar - bizdiń bolashaǵymyz. Jaqyn jerde balabaqsha da bar. Sanitarlyq sharalar buzylǵan, araqashyqtyq 1000 metr bolýy kerek, ol joq", - dep ashýlandy aýyl turǵyny Jadyra Jańabaeva.
Sibir jarasynyń bakteriialary, sarapshylar pikirinshe, adamdar men janýarlar densaýlyǵyna qaýip tóndire otyryp, ondaǵan jyl boiy ómir súre alady. Aýyl turǵyndary mundai qaýipti derttiń oshaǵy nege dál osy aýyldyń ortasynda ornalasqanyn túsinbeidi.
"Bul jerde buryn sibir jarasyna shaldyqqan adamnyń jeke zattary men kerek-jaraqtary saqtalǵan qoima bolǵan. Tiisinshe, barlyq zat órtelip, dezinfektsiialanyp, osynda kómilgen. Erejege sáikes is-qimyl tártibi osyndai", - dep túsindirdi Jambyl aýdany ákiminiń orynbasary Aqniet Tumataev.
Jergilikti bilik aýrýdyń yqtimal oshaǵyn joiý múmkin emes ekenin aitty. Óitkeni juqtyrý qaýpi bar. Jerde de sibir jarasy 50 jyldan asa saqtalýy múmkin.
