Almaty oblysynda Eskeldi, Qaratal aýdandary men Taldyqorǵan qalasynda turatyn analar ataýly áleýmettik kómekti ala almai jatyr, – dep habarlaidy "Ult aqparat".
Máselen, bir ǵana Taldyqorǵan qalasy boiynsha 5359 anaǵa tólenýi tiis 330 mln teńgeniń tek jartysy ǵana tólenipti. Al Eskeldi aýdany boiynsha 700-ge jýyq ana sońǵy ret atalǵan járdemaqyny qyrkúiek aiynda alǵandaryn aitady.
«Týra kerek kezde, týra qystyq kiim alatyn kezde, balalarymyzǵa kiim alatyn kezde, kómir alatyn kezde aqshany túsirmei otyr. Almaty oblysynda biýdjette aqsha joq degenge eshkim senbeidi. Túsirip bersin, ózimizge tiesili aqshany surap otyrmyz, birinshiden. Ekinshiden, zań boiynsha ár aidyń 10-yna deiin tólenedi deidi. Qansha kún asyp ketti. Biz zańǵa qaishy eshteńe istep otyrǵan joqpyz» dedi Taldyqorǵan qalasynyń turǵyny Áliia Maqulova.
Ataýly áleýmettik kómekti alýǵa májbúr kópbalaly jáne jaǵdaiy tómen otbasylar járdemaqynyń ýaqtyly túspeýinen túrli qiyndyqtarǵa tap bolyp jatqandaryn aitady. Úilerine otyn, bala-shaǵalaryna jyly kiim ala almaý óz aldynda, ishetin tamaq ta taýsyldy dep otyr. Sharasyz kúide qalǵan olar sheneýnikter aqsha túsedi degen qurǵaq ýádege senip, kúnde qazposhtaǵa kelip, uzyn-sonar kezekte turyp, shottaryn tekserýmen júr.
Al Almaty oblysy ákiminiń orynbasary muńyn aityp kelgen analardy tólem eki kúnniń ishinde bolady dep jubatty.
«Ministrlikten aqshany tańerteń bizge jiberdi. Erteń biz qala men aýdandarǵa jiberemiz. Sodan keiin aqshany sizderge taratady. Shamamen eki kúnde túsedi» dedi Almaty oblysy ákiminiń orynbasary Batyrjan Baijumanov.
