Búgin Qazaqstan Respýblikasy Tuńǵysh Prezidenti kúni men Táýelsizdiktiń 25 jyldyǵyna orai Taldyqorǵandaǵy «Jastar» Sport saraiynda Almaty oblysy ákiminiń jyl saiynǵy «Kóshbasshy – 2016» syilyǵy saltanatty túrde tapsyryldy. Bul syilyq ár túrli salada belsendi eńbek etetin jastardy yntalandyrý maqsatynda beriledi.
Saltanatty jiynǵa qatysýshylardy Almaty oblysynyń ákimi Amandyq Batalov quttyqtady. Ol óz sózinde memleket qoldaýynyń arqasynda jastarǵa barlyq múmkindikter jasalyp otyrǵanyn, sondyqtan jastardyń eń basty mindeti jaqsy oqyp, eńbektenýden sharshamai, alǵa qarai umtylý ekenine toqtalyp ótti.
- Sizderdiń árqaisylaryńyz da álemdegi eń aqyldy, eń talanatty adamsyzdar. Keide ózgeler áldeqaida talantty siiaqty kóringenimen, bári óz qoldaryńyzda ekenin umytpańyzdar. Jastardyń jalyndy energiiasy, batyl sheshimderi, jarqyn ideialary, maqsatqa jetýdegi tabandylyqtary qoǵam úshin árqashan qundy. Búgin biz óz talanttaryn durys baǵyttap, túrli salada biik jetistikterge jetip júrgen, óz isinde kóshbasshy bola bilgen jastardy marapattaǵaly otyrmyz. Bul – úlken jetistik. Sizderdi búgingi marapattaryńyzben shyn júrekten quttyqtaimyn. Budan keiin de biik shyńdardy baǵyndyryp, Ult Kóshbasshysymen birge jańa jeńisterge jete berińizder! – dedi A. Batalov.
Oblys ákimi quttyqtaý sózinen keiin jastar syilyǵynyń jeńimpazdaryna diplomdar men aqshalai syilyqtardy tabys etti.
Máselen, «Úzdik jas jýrnalist» nominatsiiasynda «QazAqparat» halyqaralyq aqparat agenttiginiń jáne «31» telearnasynyń menshikti tilshisi Samal Qabysheva, «Úzdik jas ónerpaz» atalymynda «Taldyqorǵan áýenderi» folklorlyq-etnografiialyq án-bi ansambliniń jeke daýystaǵy ánshisi Madi Musafirov júldeger bolsa, múmkindigi shekteýli jandarǵa arnalǵan «Asar» fitnes-klýbynyń direktory Eldos Baialyshbaev «Úzdik jas kásipker», Uiǵyr aýdany Shonjy aýyldyq okrýgindegi mal dárigerlik pýnktiniń mal dárigeri Ardaq Aitbaev «Úzdik jas aýyl sharýashylyǵynyń mamany», I. Jansúgirov atyndaǵy Jetisý memlekettik ýniversiteti zań fakýltetiniń aǵa oqytýshysy Timýr Jumaǵulov «Úzdik jas ǵalym», Panfilov aýdany Abai atyndaǵy mekteptiń aǵylshyn tili pániniń muǵalimi Uldana Begimbekova «Úzdik jas ustaz», Alakól aýdanyndaǵy № 26 órt sóndirý bóliminiń órt sóndirýshisi Ersultan Seidahmetuly «Jas batyr» atandy.
2016 jyldyń jańa kóshbasshylary atanǵan ártúrli salanyń 17 jas mamany jinalǵan kópshilikti aldaǵy memlekettik merekelermen quttyqtap, ózderine kórsetilgen qoldaýlar úshin zor rizashylyqtaryn bildirdi.
Shara sońynda tanymal qazaqstandyq estrada ánshileriniń kontserti usynyldy.
Jalpy, jastar syilyǵy jyl saiyn 17 nominatsiia, atap aitqanda, «Úzdik jas memlekettik qyzmetker», «Úzdik jas saiasatker», «Úzdik jas ónerpaz», «Úzdik jas kásipker», «Úzdik jas sportshy», «Úzdik jas aýyl sharýashylyǵynyń mamany», «Úzdik jas áskeri qyzmetker», «Úzdik jas ǵalym», «Úzdik jas maman», «Úzdik jas dáriger», «Úzdik jas ustaz», «Úzdik erikti», «Úzdik stýdent», «Jas batyr», «Úzdik jas jýrnalist», «Úzdik «Jasyl el» sarbazy», «Jas ulan» biryńǵai balalar men jasóspirimder uiymynyń úzdik kóshbasshysy» atalymdary boiynsha ótedi.
