© Sputnik / Bolat Shaihinov /
Almaty oblysynda 2-synyp oqýshysyn zorlaý deregi tekserilip jatyr, - dep habarlaidy Tengrinews.kz saity.
Oqiǵa týraly 29 naýryzda NeMolchi.kz qory jariialady. Qorǵa Almaty oblysy Jambyl aýdany Qasymbek aýylynyń jurtshylyǵy júgingen. Aýyl turǵyndarynyń aitýynsha, jantúrshigerlik oqiǵa biyl 23 naýryzynda jergilikti mektepte bolǵan.
"Bir apta buryn mektepte jantúrshigerlik oqiǵa boldy: besinshi synyptyń eki oqýshysy bastaýysh mekteptiń ekinshi synybynda oqityn balany zorlaǵan. Onyń ústine kámeletke tolmaǵandardyń biri 8-synyp oqýshysy ózine solai istegenin alǵa tartady. Mektepte oiǵa kelmeitin oqiǵalar bolyp jatyr, ol oblystyq bilim basqarmasyna birneshe ret jazylǵan. Biraq bul jaǵdai múlde shekten shyqty. Bul joly da bárin eshteńe bolmaǵandai jaba salady dep qorqamyz", - deidi aýyl turǵyndary.
Belsendiler quzyrly organdardan mán-jaidy anyqtap, zorlyq-zombylyq deregi rastalsa, kámeletke tolmaǵan quqyq buzýshylardy arnaiy mektep-internatqa jiberýdi, al olardyń ata-analaryn Qylmystyq kodekstiń 140-baby "Kámeletke tolmaǵan balany tárbieleý jónindegi mindetterdi oryndamaý" boiynsha jaýapqa tartýdy surady.
"23 naýryzda 2, 5 jáne 8-synyp oqýshylary arasyndaǵy oqiǵa deregi boiynsha bir mezgilde akt zalynda oqýshylardyń ata-analarymen (20-30 adam) jinalys ótti. Prokýratýra, ákimdik jáne politsiia ókilderi atalǵan másele boiynsha atqarylyp jatqan sharalar týraly túsindirme berdi.
Sondai-aq, jábirlenýshiniń anasymen bólek áńgime júrgizildi. Aýdan prokýratýrasy prokýrorlyq qadaǵalaý aktisin, iaǵni bilim bólimine tanystyrýdy engizdi", - dedi oblystyq prokýratýranyń baspasóz qyzmeti.
Óz kezeginde oblystyq bilim basqarmasy qazirgi ýaqytta sot-meditsinalyq saraptama júrgizilip jatqanyn málimdedi.
"Oqýshylar jáne ata-analarmen áńgime boldy. Oqiǵa ornynda ministrlik, oblystyq bilim basqarmasy ókilderi men psihologtardan quralǵan top jumys istep jatyr. Bul derek EAK-ke tirkeldi. Oqiǵanyń mán-jaiy anyqtalyp jatyr", - dedi vedomstvo ókilderi.
