Foto: Videodan skrinshot
Almaty oblysynda 14 jastaǵy jasóspirim qaza tapty. Otbasynyń aitýynsha, balany joǵarǵy synyptyń oqýshylary soqqyǵa jyqqan, dep habarlaidy Ult.kz Almaty.tv arnasyna silteme jasap.
Oqiǵa qalai boldy?
Qaiǵyly jaǵdai 13 qyrkúiek keshinde bolǵan. Týystarynyń aitýynsha, Alihan úiden serýendeýge shyqqan, alaida bir saǵattan keiin ony es-tússiz kúide taýyp alǵan. Oqiǵa ornyna kelgen ákesi ulyn jaraqatpen kórgen, al kýágerler balanyń «esh sebepsiz qulap qalǵanyn» aitqan.
«Men kelgenimde ulymnyń janynda shamamen on shaqty adam turdy. “Ne boldy?” dep suraǵanda, olar “Balańyz kenetten qulap qaldy” dep jaýap berdi», – dedi marqumnyń ákesi Daniiar Nurǵaliev.
Otbasynyń nusqasy
Týystary Alihannyń soqqyǵa jyǵylǵanyn aitady. Ákesiniń sózinshe, dúken kamerasynyń jazbasynda bir top joǵary synyp oqýshysynyń Alihandy toqtatyp, qarańǵy kóshege qarai ertip bara jatqany kórinedi.
«Ulymdy jansaqtaý bólimine aparǵan kezde dárigerler onyń soqqy alǵanyn aitty. Kameradan da kórinip tur — ony ádeii qarańǵy kóshege alyp ketken. Budan bólek, kúdiktiler dostaryna “Qazir Alihandy ustap alyp, sabaimyz” degen», – dedi Daniiar Nurǵaliev.
Politsiianyń túsindirmesi
Talǵar aýdanynyń politsiiasy qylmystyq is qozǵaǵan. Bir jasóspirim kúdikti retinde ustalyp, ýaqytsha ustaý izoliatoryna qamalǵan. Alaida marqumnyń týystary qylmysty saralaýmen kelispei otyr jáne oqiǵaǵa qatysqan barlyq balany jaýapkershilikke tartý kerek dep esepteidi.
«Kámeletke tolmaǵan balanyń ólimine ákep soqqan dene jaraqatyn keltirý deregi boiynsha qylmystyq is qozǵaldy. Kúdikti ustalyp, sot sheshimimen qamaýǵa alyndy», – dedi Almaty oblystyq politsiia departamentiniń resmi ókili Ernar Saidildin.
Aita keteiik, buǵan deiin Túrkistanda 15 jastaǵy oqýshyny soqqyǵa jyǵyp óltirgen oqiǵa boiynsha da barlyq qatysýshylar ustalyp, tergeý júrip jatyr.
