3,4 millionnan astam qazaqstandyq tótenshe jaǵdai kezinde tabysynan aiyrylýyna bailanysty 42500 teńgeden áleýmettik tólem aldy. Bul týraly QR Eńbek jáne halyqty áleýmettik qorǵaý ministrliginen málim etti, dep habarlaidy "Ult aqparat".
«3 mln 482 myń adamǵa TJ kezeńinde tabysynan aiyrylýyna bailanysty Memlekettik áleýmettik saqtandyrý qorynan (MÁSQ) áleýmettik tólem taǵaiyndaldy», - dedi ministrlikten.
Jalpy, 17 sáýir saǵat 11:00-degi jaǵdai boiynsha, 42 500 teńge kólemindegi tólemge 6 mln 671 myń azamat ótinish bergen. Eń kóp ótinish Almaty oblysynan túsken – 846,5 myń. Túrkistan oblysynan – 801,6 myń, Almaty qalasynan – 784,2 myń, Nur-Sultan qalasy – 507,8 myń, Shymkent qalasy 431 myń ótinish jiberilgen.
Járdemaqy eń kóp taǵaiyndalǵan óńirlerdiń aldyńǵy qatarynda Almaty oblysy tur. Bul óńirde 42500 teńgeden 520 myń adam aldy. Túrkistan oblysynda – 415,6 myń, Almaty qalasynda 333,2 myń turǵyn aldy.
Sondai-aq Eńbek ministrligi ótinishterdi qaraý merziminiń ulǵaiýyna jol bermeý maqsatynda ótinishti bir ret qana jolaýdy suraidy.
MÁSQ-ta tólem jasaý týraly sheshim qabyldanǵannan keiin ótinish berýshige SMS-habarlama keledi. Keiinnen ótinish berýshiniń derekteri «Azamattarǵa arnalǵan úkimet» memlekettik korporatsiiasy» KEAQ-ǵa jiberiledi. Ol ony ekinshi deńgeidegi bankterge tólem júrgizý úshin jiberedi.
Áleýmettik tólem alýǵa ótinimdi eGov portaly, 42500.enbek.kz veb-saity jáne https://t.me/Help42500Bot adresi boiynsha Telegram-bot arqyly berýge bolady.
Esterińizge sala keteiik, qoldanystaǵy Qaǵidalarǵa sáikes TJ kezeńinde qyzmettiń shektelýine bailanysty tabysynan aiyrylǵan jaǵdaida bir adamǵa MÁSQ-tan aiyna 42 500 teńge mólsherinde beriletin áleýmettik tólem kelesi sanattarǵa:
– jeke kásipkerlerge jáne shaǵyn jáne orta kásipkerlik sýbektileriniń jalaqysy saqtalmaityn demalystaǵy qyzmetkerlerine;
– karantin engizilgen eldi mekenderde qyzmetin júzege asyratyn iri kásipkerlik sýbektileriniń jalaqysy saqtalmaityn demalystaǵy qyzmetkerlerine;
– memlekettik mekemelerdi qospaǵanda, kommertsiialyq emes zańdy tulǵalardyń jalaqysy saqtalmaityn demalystaǵy qyzmetkerlerine;
– jeke praktikamen ainalysatyn adamdarǵa (notariýs, jeke sot oryndaýshysy, advokat, kásibi mediator);
– QR Salyq kodeksiniń 774 babyna sáikes, biryńǵai jiyntyq tólemdi tóleýshiler bolyp tabylatyn jeke tulǵalarǵa;
– nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sipattaǵy sharttar boiynsha tabys tabatyn, salyq agentteri olar úshin mindetti zeinetaqy jarnalaryn aýdarǵan adamdarǵa taǵaiyndalady.
1-shi jáne 2-tarmaqshalar ulttyq basqarý holdingteriniń, ulttyq holdingter men ulttyq kompaniialardyń qyzmetkerlerine qatysty emes.
