Almaty oblysynyń qylmystyq ister boiynsha mamandandyrylǵan aýdanaralyq soty birneshe qylmysqa kináli dep tanylǵan burynǵy 5 politseige qatysty aiyptaý úkimin shyǵardy, dep habarlaidy "Ult aqparat" Almaty oblystyq sotynyń baspasóz qyzmetine silteme jasap.
Almaty oblystyq soty taratqan málimetke súiensek, sot úkimi 2021 jylǵy 28 maýsymda shyǵarylǵan. Onda jazaly dep tanylǵan politseilerge mynadai aiyp taǵylǵan:
1) esirtki quraldaryn, psihotroptyq zattardy ótkizý maqsatynda laýazymdy tulǵanyń qyzmettik jaǵdaiyn paidalana otyryp, adamdar tobynyń aldyn ala sóz bailasýymen zańsyz daiyndaǵany, qaita óńdegeni, satyp alǵany, saqtaǵany jáne tasymaldaǵany (QR QK 297-baby 3-bóliginiń 1), 4) tarmaqtary);
2) birneshe ret qorqytyp alý jolymen, adamdar tobynyń aldyn ala sóz bailasýymen para alǵany (QR QK 366-baby 3-bóliginiń 1), 2), 4)-tarmaqtarymen);
3) laýazymdyq ókilettikterin teris paidalanǵany (361-baptyń 1-bóligi);
4) Kórineý zańsyz ustap alǵany, kúzetpen qamaýǵa alǵany nemese kúzetpen ustaǵany (QR QK 414-babynyń 1-bóligi);
5) laýazymdy adam óziniń qyzmet babyn paidalana otyryp jasalǵan alaiaqtyq áreketteri (QR QK 190-baby 2-tarmaǵy), 3-bóligi) úshin aiyp taǵyldy.
Sot olardy taǵylǵan aiyptar boiynsha kináli dep tanyp, qylmystyq quqyq buzýshylyqtardyń jiyntyǵy boiynsha qylmystyq jaýaptylyq pen jazany jeńildetetin jáne aýyrlatatyn mán-jaidy eskere otyryp, sottalǵan adamnyń qylmys jasaýǵa qatysý róline, dárejesine qarai 2 jyldan 12 jylǵa deiin bas bostandyǵynan aiyrý jazasyn taǵaiyndady. Sottyń bul úkimimen kelispegen sottalýshylar apelliatsiialyq shaǵym túsirdi.
