Foto: ashyq derekkóz
Almatyda metronyń jańa jelilerin salý úshin sheteldik merdiger uiymdardy tartý múmkindigi qarastyrylyp jatyr. Bul týraly «Almatybasjospar» ǴZI bas direktory Ashat Sádýov aitty, dep habarlaidy Ult.kz Aikyn.kz basylymyna silteme jasap.
Aitýynsha, ózge megapolisterde mundai aýqymdy infraqurylymdyq jobalar eki jylda salynady.
– Qytai men Máskeýdiń tájiribesin kórip otyrmyz: olar metro stansalaryn ǵana emes, tutas jelilerdi de óte jyldam salady. Mysaly, shartty túrde qytailyq kompaniialarmen kelisim jasalsa, olar bir jelini eki jylda salyp shyǵýy múmkin. Sebebi olarda týnnel qazatyn tehnika jetkilikti. Al bizde bir ǵana tehnika bar, ol áreń jumys istep tur. Bul, eń aldymen, tehnikanyń tapshylyǵyna bailanysty. Qalanyń jerastynda damýy – ýaqyt talaby. Birinshiden, metro – jer silkinisi kezinde panalaityn qaýipsiz oryn, ekinshiden, bul barlyq ekonomikalyq salanyń damýyna serpin beredi, – dedi Ashat Sádýov.
Ol metro qurylysyna salynatyn investitsiialar uzaqmerzimdi perspektivada ózin tolyq aqtaitynyn aitty. Óitkeni metro stansalary jolaýshylar aǵynyn jedeldetip, qalalyq ortanyń, qala ekonomikasynyń, sondai-aq shaǵyn jáne orta biznestiń damýyna oń áser etedi.
Sonymen qatar «Almatybasjospar» basshysy qazirgi tańda birde-bir merdigermen naqty kelisim jasalmaǵanyn da aitty.
– Ázirshe eshqandai kelisim joq. Barlyǵy biýdjet kólemin naqtylaityn tehnikalyq-ekonomikalyq negizdemeni kútip otyr. Biýdjet kólemi belgili bolǵan soń ǵana kelissózder júrgizýge bolady. Máskeý men Qytai siiaqty jyldam salatyndar az. Olardyń da tájiribesi jetedi, nátijeleri de jaqsy. Sol sebepti jobany az ýaqytta iske asyra alatyn merdigerlerge júginýdiń máni bar, – dedi ol.
