Foto: ashyq derekkóz
Almaty qalasynyń politsiia departamenti áleýmettik jeliler men messendjerlerde taraǵan mektepterde terakt jasalýy múmkin degen aqparatty joqqa shyǵardy, dep habarlaidy Ult.kz.
Politsiianyń resmi málimetinshe, atalǵan habarlamalar shyndyqqa sáikes kelmeidi jáne feik aqparat. Qazirgi ýaqytta qaladaǵy bilim berý uiymdaryndaǵy jaǵdai turaqty, tolyq baqylaýda.
Quqyq qorǵaý organdary men jedel qyzmetter oqýshylar men pedagogterdiń qaýipsizdigin qamtamasyz etý maqsatynda kúsheitilgen rejimde jumys istep jatyr.
Jalǵan aqparatty taratý deregi boiynsha jedel-izdestirý sharalary bastaldy. Feik habarlamanyń avtory men derekkózi anyqtalyp jatyr. Kináli tulǵalar zańnamaǵa sáikes jaýapkershilikke tartylady.
Politsiia azamattardy sabyr saqtaýǵa, tek resmi aqparat kózderine senýge jáne rastalmaǵan málimetterdi taratpaýǵa shaqyrdy.
