Almaty mektepterinde 1-5 synyptar aralyǵynda qosymsha kezekshi synyptar ashýǵa tyiym salyndy. Bul týraly Almaty sanitariialyq-epidemiologiialyq baqylaý dpartamentiniń basshysy, qalanyń bas memlekettik sanitar dárigeri Jandarbek Bekshin onlain brifing barysynda aitty, dep habarlaidy QazAqparat.
Onyń aitýynsha, oqýshylar arasynda virýs juqtyrý kórsetkishi kóterilgen.
«5 qańtardaǵy jaǵdaiǵa sáikes oqýshylar arasynda 311 oqýshydan KVI anyqtalǵan. Onyń ishinde 15 oqýshy Almaty arqyly eldiń basqa óńirlerine ótip bara jatqan. Olar jergilikti turǵyn emes. Qala oqýshylary arasynda 296 jaǵdai tirkeldi. 262 oqýshy qashyqtan oqyǵan kezde juqtyrǵan. 1-4 synyp aralyǵynda - 38 oqýshy, 5-8 synyp aralyǵynda -40 oqýshy, 9-12 synyp aralyǵynda 21 oqýshy juqtyrǵan. Iaǵni, juqtyrý kórsetkishi artyp keledi», - dedi ol.
Bekshinniń aitýynsha, onlain oqýdyń arqasynda aýrýdyń jedel taralýynyń aldy alyndy.
«Biz 1500 balany aýrý juqtyrýdan aman alyp qaldyq. Qalanyń bas sanitarlyq dárigeriniń qaýlysymen 1-5 synyptar arasynda qosymsha kezekshi klastar ashýǵa tyiym salyndy. Eger osy oqýshylar mektepke baryp júrse, 1500 bala juqtyrar edi. Basqa synyptarǵa da kóshetin edi. Muǵalimder de aýyryp qalar edi. Sondyqtan bul sheshim durys dep sanaimyn»,- dedi J. Bekshin.
Al 9,11,12 synyp oqýshylaryna - úshinshi toqsannan bastap, kolledjdiń 1 kýrs stýdentterine – ekinshi semestrden bastap dástúrli oqý formatyna kóshýge ruqsat berilgen.
«Búginde joǵarǵy synyp oqýshylary arasynda kezekshi synyp ashý týraly másele qozǵalyp jatyr. Kúndelikti baqylaýǵa sáikes, 9 synyp arasynda – 17 oqýshy, 11 synyp arasynda – 12 oqýshy, 12 synyp arasynda 2 oqýshy virýs juqtyrǵan. Joǵarǵy synyp oqýshylary arasynda 260 oqýshyny aýrý juqtyrýdan alyp qaldyq», - dedi spiker.
Mektep túlekteri mektepke óz erkimen barady.
«Ata-analar balasyn mektepke jiberemin dep sheshse, sabaqtyń 70 paiyzy - oflain, 30 paiyzy - onlain bolmaq», - dedi ol.
Ár synypta 15 oqýshydan aspaýy shart.
«Qalalyq bilim basqarmasy mektepterdi dezinfektsiialaý quraldarymen qamtidy. Dálizde toptasyp qalmas úshin ár synyp úziliske ár ýaqytta shyǵady. Mektepte maska rejimi qatań saqtalady», - dedi Bekshin.
