Foto: Polisia.kz
Ishki ister ministrligi «Zań men Tártip» qaǵidaty aiasynda júrgizgen arnaiy operatsiia barysynda Almaty oblysynan jasyryn esirtki zerthanasy anyqtalyp, onyń qyzmeti toqtatyldy. Polisia.kz taratqan málimetke sáikes, operatsiia Shý qalasynan Almaty oblysyna deiin «baqylanatyn jetkizý» ádisimen júzege asqan.
Qarasai aýdanyna qarasty «Turar baqshasy» eldimekeninde ornalasqan zerthanada sintetikalyq esirtki óndirý jáne ony taratý isimen ainalysqan qylmystyq shema joiyldy. Ony kórshi eldiń eki azamaty uiymdastyrǵan.
Jedel is-sharalar barysynda 11 keliden astam «mefedron» esirtkisi tárkilenip, shamamen 35 myń bir rettik doza ainalymǵa túspei qaldy. Onyń qara naryqtaǵy quny 1,6 million AQSh dollaryna baǵalanady.
Zerthanaǵa júrgizilgen tintý kezinde qosymsha 20 litr jáne 115 kilogramm psihotroptyq zat, sondai-aq eki tonnadan astam prekýrsor (esirtki daiyndaýǵa qajetti himiialyq zattar) tárkilengen. Mamandar bul kólemnen shamamen 120 kilogramm sintetikalyq esirtki daiyndalýy múmkin ekenin aityp otyr. Osylaisha, qylmystyq ortaǵa 17,5 million AQSh dollary kóleminde zalal keltirildi.
Kúdiktiler ýaqytsha ustaý izoliatoryna qamaldy.
