11-16 jeltoqsan aralyǵynda Túrkiianyń Býrsa qalasyndaǵy «Tayyare Kültür Merkezi» atalatyn Mádeniet ortalyǵynda HH halyqaralyq «Býrsa-Qaragóz» qýyrshaq jáne kóleńkeli teatr festivali ótti. Túrkiiada 1993 jyldan beri ótkizilip kele jatqan bul festivalge Túrkiiadan 14 kásibi qýyrshaq teatry qatyssa, shetelden 3 memleketten festivaldiń irikteý kezeńinen súrinbei ótken qýyrshaq teatrlary arnaiy shaqyrtý aldy. Sonyń biri - Almaty qalasy Mádeniet basqarmasyna qarasty «Memlekettik qýyrshaq teatry».
Ártúrli qýyrshaqtarǵa jan bitirip oinata bilgen artisterdiń sheberligi Býrsa qalasynyń kishkentai kórermenderin ań-tań etti. Almaty qýyrshaq teatry rejisserler Sultanǵali Shúkirov pen Quralai Eshmuratova jazǵan shyǵarmany sahnalaýda trosty qýyrshaq, planshetti qýyrshaq, marionetka jáne rastovoi qýyrshaqtardy qoldandy.
Bar kórgen-bilgeni, suraityny telefon, ertegige senbeitin, qýyrshaqpen kóp oinai qoimaityn búginginiń balasy úshin teatr sońǵy aialdama. Em-domy da osy jerde. Teatr bala úshin sulýlyq pen estetika baspaldaǵy, al ol qazaq teatry bolsa eki ese tárbie quraly. Biz qýyrshaq teatryn kórmei, birden akademiialyq drama teatrdyń aýyr qoiylymdaryn tamashalaǵan urpaqpyz. Múmkindigi bola tura, qýyrshaq teatrynyń tabaldyryǵyn birde bir ret attamaǵan balaǵa drama teatrlar óskende qiialilardyń mekeni siiaqty sezilýi múmkin. Býrsadaǵy qoiylym bitken soń memlekettik teatrdyń artisterin áńgimege tarttyq. 23 jyldan beri qýyrshaq teatrynda qyzmet etip kele jatqan «Mádeniet salasynyń úzdigi» Altai Táýekelovtyń aitýynsha, árbir ata-ana balasynyń izgilikke qushtar ári meiirimdi bolyp óskenin qalasa qýyrshaq teatryna alyp kelgeni durys.
Túrkiia tarapy uiymdastyrǵan Qaragóz qýyrshaq festivaline osymen ekinshi ret qatysyp otyrǵan Almaty qýyrshaq teatry qorjynynda otandyq jáne sheteldik avtorlardyń shyǵarmalary bar. Búginde jas rejisserlerdiń tynymsyz izdenisiniń nátijesinde qýyrshaq teatrynyń repertýary balanyń oi-órisin keńeitip, ertegi álemine qumar, teatrǵa degen qyzyǵýshylyǵyn oiatatyn qoiylymdarǵa toly. Daryndy artist Altai Batyrbekulynyń sózinshe, qýyrshaq teatry jyl saiyn maýsymashardan soń birden Qazaqstannyń aýyl-aimaqtaryna gastroldik saparǵa attanady. Elimizdiń túkpir-túkpirinde ornalasqan Mádeniet úilerinde álemge tanymal, balany qyzyqtyratyn tárbielik máni zor shyǵarmalardy sahnalaidy.
Qundyz ERALY, Túrkiia, Býrsa qalasy
