Jazataiym oqiǵalardyń kópshiligi jabdyqtalmaǵan sý qoimalarynda oryn alady. Almaty qalasynyń Tótenshe jaǵdailar departamentiniń qyzmetkerleri talapty oryndaýǵa, qaýipsizdikti saqtaýǵa shaqyrdy, dep habarlaidy "Ult aqparat".
Óńirlik kommýnikatsiialar qyzmetiniń brifinginde 9 maýsymda ótken Almaty qalasy Tótenshe jaǵdailar departamenti basshysynyń orynbasary, Erlan Álibekov qala turǵyndaryn sýdaǵy qaýipsizdik erejelerin saqtaýdy, tyiym salynǵan oryndarǵa barmaýdy eskertti.
Erlan Álibekovtiń aitýynsha, barlyq qutqarýshylar qala turǵyndarynyń «jabaiy» jaǵajailar men demalys oryndaryna barýyna alańdaidy. Sebebi, keibir jaǵajailarda sý aǵyny qatty, tereńdiktiń kúrt ózgerýine yqpal etetin jartastar, synǵan plitalar men áinek bolýy múmkin.
Spiker búginde Almaty qalasynda shomylýǵa ruqsat etilgen 4 oryn baryn eske saldy, olar:
1. Sairan kóli – Tóle bi kóshesinen ońtústik baǵytta 200 metr – Almaly aýdany;
2. Sairan kóli – Tóle bi kóshesinen pirske deiin ońtústik baǵytta 300 metr – Áýezov aýdany;
3. D. Qonaev atyndaǵy ÚAK – Baým toǵaiy – Túrksib aýdany;
4. D. Qonaev atyndaǵy ÚAK – demalys aimaǵy Gúlder – Jetisý aýdany.
Sairan kóliniń ruqsat etilgen jerlerinde shyǵys pen batys jaǵynan býikalar ornatylǵan.
Úlken Almaty kanalyna (Baým toǵaiy, Gúlder demalys aimaǵy qaita qurýǵa bailanysty) osy jyly sý toltyrý josparlanbaǵan.
Erlan Álibekovtiń aitýynsha, «jabaiy» jaǵajailarda shomylý qaiǵyly oqiǵalarǵa ákelýi múmkin. Ata-analar jazǵy demalys kezinde balalardyń qaýipsizdigine jete nazar aýdarýy tiis.
Onyń pikirinshe, tájiribe men baqylaýǵa qaramastan qaiǵyly oqiǵalar erejeniń buzylýynan bolady.
Tótenshe jaǵdailar departamentiniń qyzmetkerleri politseilermen birlesip kún saiyn QR ákimshilik kodeksiniń 440-baby boiynsha (spirttik ishimdikter ishý nemese qoǵamdyq oryndarda mas kúide bolý) tártip buzǵandardy ákimshilik jaýapkershilikke tartýda ári sý aidyndarynyń aýmaǵynda patrýlder kezekshilikterin atqarýda. Jaz maýsymynda tártip buzǵan 15 adamǵa aiyppul salyndy.
Almaty qalasynyń Sairan kólinde qutqarý qyzmetiniń maýsymdyq beketi qoiylyp, shomylýǵa tyiym salatyn 14 taqtaisha ornatyldy. Áýejai kólinde statsionarlyq qutqarý beketi jumys isteidi. Sondai-aq osy jazda Almaty sý aidyndarynda qutqarýshylar, sýda qutqarý jasaǵynyń qyzmetkerleri, politsiia qyzmetkerleri men QR Ulttyq ulanynyń №5571 «Ońtústik» bóliminiń áskeri qyzmetshileri kezekshilik etedi. Endi qutqarýshylar tek qaiyqtarmen ǵana emes, dronnyń kómegimen de qaýipsizdikti qadaǵalaityn bolady.
Sonymen qatar, spiker sý aidyndarynda saqtalýy tiis birneshe talaptardy atady.
«Ruqsat etilgen jerde ǵana shomylyńyz, jaǵalaýdyń qorshaý belgileri men býikalarynan alys júzýge bolmaidy. Eger siz ruqsat etilgen jerde shomylsańyz, belden joǵary sýǵa túspeńiz. Balalardy qaraýsyz qaldyrmańyz. Qaiyqtardan, kópirler men ailaqtardan sýǵa sekirmeńiz. Túngi ýaqytta, taý ózenderinde mas kúiinde shomylmańyzdar»,– dep eskertti Almaty qalalyq TJD bastyǵynyń orynbasary.
Óz kezeginde Almaty qalasy Bilim basqarmasynyń adamgershilik-rýhani tárbie men ózin-ózi taný bóliminiń basshysy Nurgúl Taý ata-analardy balalardy sý aidynyndaǵy talapty buzbaýǵa, kóshe men úidegi qaýipsizdik erejelerin oryndaýǵa shaqyrdy.
