Shaǵyn jáne orta biznes qyzmetkerleri MÁMS paketinen meditsinalyq kómek alýy úshin olardyń jumys berýshileri 25 qańtarǵa deiin áleýmettik meditsinalyq saqtandyrý qoryna jaldamaly qyzmetkerleri týraly aqparat berýi tiis. Bul týraly «Áleýmettik meditsinalyq saqtandyrý qory» KeAQ Almaty filialynda aityldy, dep habarlaidy QazAqparat.
Ótken jyldyń sáýir aiynda pandemiiaǵa bailanysty salyqtar men áleýmettik tólemderden bosatylǵan ShOB nysandarynyń tizimi bekitilgeni belgili.
Alǵashynda 1qazanǵa deiin berilgen jeńildik Úkimettiń №721 qaýlysy negizinde jyl sońyna deiin taǵy uzartylǵan bolatyn.
Osynyń negizinde pandemiiadan zardap shekken biznes nysandary mindetti meditsinalyq saqtandyrý júiesine aýdarylatyn tólemderden de 9 aiǵa bosatyldy.
Filial direktorynyń orynbasary Janar Kenjebaevanyń aitýynsha, shaǵyn jáne orta biznes nysandary óz qyzmetkerleri týraly málimetti 2020 jyldyń shildesinen bastap ár aidyń 25-ine deiin turaqty túrde jańartyp otyrýy tiis bolatyn.
«Jalpy, Almaty qalasy boiynsha jyl sońyna deiin MÁMS tóleýden bosatylǵan shaǵyn jáne orta biznes sýbektileri – 116 604, onyń ishinde 60 259-y 2020 jyldyń ishinde derekterdi ózektendirdi. Osylaisha, birqatar kásiporyndardyń jaldamaly qyzmetkerleri MÁMS júiesinen tys qalady. Sondyqtan jumys berýshilerge ShOB qyzmetkerleriniń saqtandyrylý mártebesi boiynsha júrgizilip jatqan jumystyń mańyzdylyǵyn túsiný jáne derekterdi Qor saityna engizý mańyzdy» - dep túsindirdi J.Kenjebaeva.
Sonymen qatar, ol qyzmetkerlerdi saqtandyrý úshin ne isteý kerektigin aitty.
«Ol úshin jumys berýshi msb.fms.kz saityna kiredi. Zańdy tulǵanyń nemese Jeke kásipkerlik nysanynyń ETsQ kómegimen Qordyń aqparattyq júiesine tirkelip, paidalaný kelisimine qol qoiady. Arnaiy uiashyqqa jumyskerlerdiń JSN engizedi (tizimdi Excel formatyndaǵy bir fail arqyly nemese ár qyzmetkerdi jeke-jeke engizýge bolady. Talap tolyq oryndalǵan jaǵdaida qyzmetkerlerdiń MÁMS júiesindegi mártebesi jarty saǵatta rastalady)», - dedi ol.
