Almaty qalasynyń prokýrory Berik Júiriktaev áleýmettik jelilerde taraǵan josparlanǵan sanktsiialanbaǵan mitingke bailanysty úndeý jasady, dep habarlaidy "Ult aqparat".
Almaty qalasynyń prokýratýrasy mundai aktsiialar ótkizilgen jaǵdaida qatysýshylardyń is-áreketteri «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Zańdy buzý retinde saralanatynyn eskertedi.
«Qurmetti Almaty qalasynyń turǵyndary men qonaqtary! Áleýmettik jelilerde jeke tulǵalar Almaty qalasynda 2021 jylǵy 24 sáýirge josparlanǵan sanktsiialanbaǵan mitingke qatysýǵa shaqyrýdy taratýda. Qala ákimdigi aktsiiany uiymdastyrýshyǵa koronavirýstyq infektsiiany juqtyrý qaýpiniń saqtalýyna jáne bas sanitarlyq dárigerdiń buqaralyq is-sharalardy ótkizýge tyiym salýyna bailanysty ony ótkizýden bas tartty. Almaty qalasynyń prokýratýrasy mundai aktsiialar ótkizilgen jaǵdaida qatysýshylardyń is-áreketteri «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Zańdy buzý retinde saralanatynyn eskertedi», - deligen prokýrordyń úndeýinde.
Onyń aitýynsha, quqyq qorǵaý organdary tártip buzýshylarǵa áreket etýge jáne sharalar qabyldaýǵa mindetti bolady.
«Osyndai aktsiialarǵa shaqyrý, uiymdastyrý jáne qatysqany úshin Ákimshilik quqyq buzýshylyq týraly kodekstiń 488-baby boiynsha jaýapkershilik týyndaidy. Eger bul áreketter eleýli zalal keltirse, onda kináliler Qylmystyq kodekstiń 400-baby boiynsha jaýapkershilikke tartylady. Bas sanitarlyq dárigerdiń talaptaryn buzý Ákimshilik quqyq buzýshylyq týraly kodekstiń 425-baby boiynsha ákimshilik jaýaptylyqqa ákep soǵady.
Eger zańsyz aktsiia ótkizý jappai aýrýǵa nemese koronavirýstyq infektsiiany juqtyrýǵa sebep bolsa, onda bul Qylmystyq kodekstiń 304-baby boiynsha qylmystyq jaýaptylyqqa ákep soǵady.
Zańnama talaptaryn múltiksiz saqtaýǵa, arandatýshylyqqa boi aldyrmaýǵa jáne zańsyz aktsiialarǵa qatysýdan bas tartýǵa shaqyramyn», - delingen Berik Júiriktaevtyń úndeýinde.
