Almaty qalalyq densaýlyq saqtaý basqarmasynyń memlekettik satyp alý bóliminiń basshysy sottaldy, - dep habarlaidy Tengrinews.kz.
Almaty qalasy Medeý aýdanynyń №2 aýdandyq sotynda S.-qa qatysty memlekettik fýnktsiialardy oryndaýǵa ýákiletti tulǵamen jasalǵan asa iri mólsherde para alý deregi boiynsha qylmystyq isi qaraldy.
"2021 jyldyń maýsym aiynda Almaty qalasy Qoǵamdyq densaýlyq saqtaý departamentiniń memlekettik satyp alý bóliminiń basshysy qyzmetin atqara otyryp, "qysqa ishek sindromy" diagnozy bar naýqas balalarǵa arnalǵan dárilik zattar men meditsinalyq maqsattaǵy buiymdardy jetkizý boiynsha memlekettik satyp alýdy uiymdastyrýshy S. , 78 mln teńge somasynda JShS-dan tenderdi jeńip alǵany úshin joǵaryda kórsetilgen kelisim somasynyń 10 paiyz mólsherinde para talap etken.
Parany bermegen jaǵdaida S., JShS-ny josyqsyz jetkizýshiler qatarynda qosýy múmkin ekenin kórsete otyryp, al utqan jaǵdaida kelisimshartty jasasýǵa jáne oryndaýǵa kómektesýge ýáde bergen.
Konkýrs aiaqtalǵannan keiin JShS quryltaishysy bul jaǵdaidy basqa jolmen sheshýge basqa múmkindigi bolmaǵandyqtan jáne joǵaryda atalǵan dárilik zattardy jetkizý boiynsha jetkizýshi bolǵysy kelip, 1 000 000 teńge kóleminde aqshany S.-ke beredi", - delingen habarlamada.
Sotta S. óz kinásin moiyndamaǵan, istegen isine ókinbegen.
Sot úkimimen S. asa iri mólsherde para alǵany úshin kináli dep tanylyp, oǵan memlekettik qyzmette, sýdia, jergilikti ózin-ózi basqarý organdarynda, Respýblika Ulttyq bankinde, Qazaqstan Respýblikasy jáne onyń vedomstvolary, qarjy naryǵyn jáne qarjy uiymdaryn retteý, baqylaý jáne qadaǵalaý jónindegi ýákiletti organ, memlekettik uiymdar men kvazimemlekettik sektor sýbektilerinde laýazymdardy ómir boiyna atqarýmen qatar, 3 jylǵa bas bostandyǵynan aiyrý jazasy taǵaiyndaldy.
Sot úkimi zańdy kúshine engen joq.
