Almatyda koronavirýspen kúresip jatqan meditsina qyzmetkerlerine 1 mlrd 134 mln teńge kóleminde ústemeaqy berildi. Bul týraly onlain brifing barysynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aitty, dep habarlaidy QazAqparat.
Basqarma basshysy dárigerler ústemeaqy almady degen aqparatty joqqa shyǵardy.
«Keshe keibir BAQ betterinde COVID-19 koronavirýsymen kúres aiasynda epidemiiaǵa qarsy is-sharalarǵa tartylǵan meditsina qyzmetkerlerine ústemeaqy tólemenbegendigi týraly aqparattar jariialandy. Atalǵan fakt boiynsha Memlekettik komissiiasynyń táýekel sanattary tizimine kiretin barlyq meditsina qyzmetkerleri jumys istegen saǵattar úshin tolyq kólemde tólemder alatyndyǵyn resmi túrde habarlaimyn. Memlekettik komissiianyń sheshimine sáikes, Memleket basshysynyń tapsyrmasy boiynsha kómek alýǵa úsh táýekel tobyna jatqyzylǵan meditsina qyzmetkerleri quqyly ekenin eske salamyz», - dedi basqarma basshysy.
Tileýhan Ábildaev Balalar qalalyq juqpaly aýrýlar aýrýhanasy men Meditsinalyq jedel járdem qyzmetinde oryn alǵan áleýmettik shieleniske bailanysty bul buiryqtyń negizgi erejeleri týraly, jalaqyǵa qosymsha beriletin ústemeaqy kimge tiesili jóninde jáne qyzmetkerler sanaty týraly ózi jeke túsindirý jumystaryn júrgizgen.
«Osy buiryqtyń táýekel tobyna kirmegen qyzmetkerlerge qatysty, olar boiynsha meditsinalyq uiymdardyń jalaqy qorynan qarjylai qoldaý týraly sheshim qabyldanyp jatyr. Bul materialdyq qoldaý meditsina qyzmetkerleriniń kúshin yntalandyrý jáne qoldaý úshin mańyzdy. Sondai-aq, tólemder QR Salyq kodeksine sáikes barlyq salyqtardy eskere otyryp, ailyq jumys balansynan aspaityn naqty jumys istegen ýaqyty úshin júrgiziletindigin eske salǵym keledi», - dedi ol.
Qazir Almatyda 3 758 qyzmetkerge, onyń ishinde 498 dárigerge, 1800 orta meditsina qyzmetkerine, 624 kishi meditsina qyzmetkerine jáne basqa da 836 qyzmetkerge, onyń ishinde meditsinalyq jedel járdem qyzmetiniń 822 júrgizýshisine tólem júrgizildi.
Olarǵa jalpy alǵanda 1 mlrd 134,8 mln teńge tólengen.
Búgin Meditsinalyq jedel járdem qyzmetiniń jumyskerlerine tólem júrgizilip jatyr. Osylaisha 100%-ǵa deiin jetkiziletin bolady.
Aita ketý kerek, Almatyda koronavirýs juqtyrǵan meditsina qyzmetkerleriniń sany 234-ke jetti.
