Almatynyń "Altyn orda" bazarynda bolǵan tóbelestiń videosy áleýmettik jelide tarap ketti. Politsiia tergeý sharalaryn bastady, dep habarlaidy Sputnik Qazaqstan.
Instagram-pablikterde taraǵan aqparatqa sáikes, "Altyn orda" bazarynda turaq úshin aqy jinaityn er adam 100 teńge berýdi talap etken. Biraq kólik júrgizýshisinde 20 myń teńgelik tutas aqshadan basqa tiyn-teben bolmady. Ol kartaǵa aýdarym jasaýdy usyndy. Biraq turaq qyzmetkeri kelisken joq. Ekeýi sózge kelip, arty tóbeleske ulasqan. Videoda janjaldyń qalai bastalǵany kórsetilmeidi. Kólik júrgizýshisi turaq qyzmetkerin jaǵadan alyp, baspen bir urady.
Al Instagram-da jariialanǵan videoda eki jaqtyń tóbelesten keiin politsiiany kútip turǵanyn kórýge bolady. Arǵy jaǵynda balaǵat sózder estiledi. Osy kezde kólik júrgizýshisi: "Toqta!",- dep, taǵy bir er adamnyń artynan júgiredi. Onyń bákini laqtyryp tastaǵanyn kórsetedi. Osydan keiin video úziledi de, birden bir top adam kóliktiń terezesin uryp jatqan kadrǵa aýysyp ketedi. Kólik júrgizýshisi qasha jóneledi. Jolda bazardyń basqa qyzmetkerleri de kólikti uryp, toqtatýǵa tyrysady.
Kólik júrgizýshisi beineúndeý de jazdy. Onyń aitýynsha, tóbeles kezinde ultaralyq janjal bolǵan joq. Ol bazar qyzmetkerleri jabylǵannan keiin kelinshegi úshin qorqyp, oqiǵa ornynan qashyp ketken.
Almaty oblystyq politsiia departamenti oqiǵanyń mán-jaiyn anyqtady. Bazardaǵy tóbeles búgin tańǵy saǵat 9:10-da bolǵan. Biraq janjaldan keiin Qarasai aýdandyq politsiia basqarmasyna eshkim aryz túsirgen joq. Degenmen áleýmettik jelilerge monitoring jasaý kezinde tóbelestiń videosy anyqtaldy. Sol boiynsha sotqa deiingi tergeý sharalary bastaldy.
"Oqiǵa ornyna shuǵyl tergeý toby bardy. Qazirgi kezde videodaǵy barlyq adam anyqtaldy. Tergeý aiasynda eki jaq ta jaýap berip jatyr", - dedi politseiler.
Qazirgi kezde Qylmystyq kodekstiń 293-baby, 2-bóligi ("buzaqylyq, aldyn ala sóz bailasý arqyly adamdar toby jasaǵan áreket") boiynsha sotqa deiingi tergeý sharalary júrgizilip jatyr. Kináli adamdar bes jylǵa deiin bas bostandyǵynan aiyrylýy múmkin.
