Almatydaǵy № 8 qalalyq emhananyń bas dárigeri Farida Aǵybaeva turǵyndardyń, onyń ishinde balalar men jasóspirimderdiń joǵary syrqattanýshylyǵyna jol bermeý maqsatynda jáne koronavirýs infektsiianyń yqtimal ekinshi tolqynyna daiyndyq boiynsha qabyldanǵan sharalar týraly aityp berdi, dep habarlaidy QazAqparat.
Onyń aitýynsha, emhanada koronavirýs infektsiiasymen kúres boiynsha arnaiy shtab qurylǵan.
«2020 jyldyń naýryz aiynan bastap KVI kúresý boiynsha epidemiiaǵa qarsy, emdeý-diagnostikalyq is-sharalardy júrgizýdi uiymdastyrý, úilestirý jáne baqylaý boiynsha jaýapty laýazymdy adamdardan turatyn shtab jumys isteidi. Basqarýshylyq sheshimderdi qabyldaý jáne oryndaý úshin emhana shtabynyń ár múshesiniń fýnktsionaly anyqtalǵan. Materialdyq jáne materialdyq emes resýrstar boiynsha tiisti esepteýleri bar COVID-19 epidemiiasynyń ekinshi tolqynyna emhananyń daiyn bolý jospary ázirlenip, SWOT – taldaý jasalǵan. Negizgi jáne qosalqy úderister bólinisinde daiyndyqty baǵalaý boiynsha chek-paraqtar ázirlendi. JRVI/ KVI-men patsienttiń baǵdar joly daiyndaldy», – deidi dáriger.
Sonymen qatar, ol meditsina mekemesi «las» jáne «taza» aimaqqa bólingenin atap ótti.
«Bizde «las» jáne «taza» aimaq bar. Sondai-aq balalar men júkti áielderge arnalǵan jeke filtr kabinetteri uiymdastyryldy. Patsientter aǵymyn suryptaý úshin dálizder ornatyldy. Emhana kireberisinde barlyq kelýshilerdiń dene qyzýyn ólsheýge arnalǵan kontaktisiz ólsheýish qondyrylǵan ornatyldy. Birinshi qabatta filtr men oqshaýlaý kabineti uiymdastyrylǵan, ol jerde COVID-19 týdyratyn klinikalyq belgileri bar patsientterdi anyqtaý maqsatynda olarǵa bailanyssyz termometriia jáne saýalnama júrgiziledi. Simptomdar anyqtalǵan jaǵdaida, bala ýaqytsha oqshaýlaý izoliatoryna ornalastyrylady. Pediatr dáriger qaraǵannan keiin, patsient ambýlatoriialyq emdeýge jiberiledi nemese provizorlyq statsionarǵa emdeýge jatqyzylady», – dedi spiker.
Sondai-aq, dene qyzýy joǵary balalar emhanaǵa kirgizilmeidi. Emhanada balalardy qabyldaý aldyn ala jazylý arqyly júzege asyrylady.
«№8 emhanada KVI aýrýynyń simptomsyz, jeńil, ortasha túri bar naýqastardy meditsinalyq baqylaý boiynsha 12 mobildi top quryldy. Mobildi brigadalar normativtik talaptarǵa sáikes jabdyqtalǵan, sonyń ishinde jedel shuǵyl kómek kórsetýge arnalǵan jiyntyqtarmen jabdyqtalǵan. Osylaisha, mobildi brigadalar epidemiialyq jaǵdaiǵa bailanysty meditsinalyq qyzmetter keshenin kórsetedi: úige shaqyrý boiynsha qyzmet kórsetý, patsientterge konsýltatsiia berý (aýdio-video), biologiialyq materialdar úlgilerin jinaý, em taǵaiyndaý qarastyrlǵan. Búgingi kúni monitoringte simptomsyz 2 naýqas bar», – deidi Farida Aǵybaeva.
Dárigerdiń aitýynsha, jalpy praktika dárigerleriniń bólim meńgerýshileri JRVI, koronavirýs infektsiiasy, qaýip tobyndaǵy patsientterge arnaiy baqylaý júrgizedi.
