Almaty áýejaiynyń prezidenti Al Er Týnga Ersoi 2024 jyldyń 20 aqpanynda jańa halyqaralyq terminal 87% daiyn ekenin, 2024 jyldyń maýsym aiynda jumys istei bastaitynyn aitty, dep habarlaidy "Ult aqparat" Zakon.kz basylymyna silteme jasap.
Osylaisha, jańa terminal tek halyqaralyq reisterge qyzmet kórsetedi. Eski terminal ózgertilip, ishki reisterge qyzmet etetin bolady.
"Búgingi tańda jańa halyqaralyq terminal ǵimaratynyń daiyndyq deńgeii 87%, ortalyq injenerlik qondyrǵy – 99%, áýeailaq – 93%, vokzal mańy aýmaǵy – 78%, estakada – 80% daiyn. 2024 jyldyń maýsymyna qarai jańa terminaldy ashýdy josparlap otyrmyz", - dedi Al Er Týnga Ersoi.
Almaty áýejaiy prezidentiniń aitýynsha, terminalda jolaýshylardy reiske tirkeitin 50 baǵana bolady. Yńǵaily bolý úshin óz betinshe tirkelýge arnalǵan baǵanalar da bolady.
"Reiske nemese pasporttyq baqylaýǵa tirkelý kezinde uzyn-sonar kezek bolatyny týraly shaǵymdar alyp jatamyz. Negizinde, jumys istep turǵan ǵimarattyń ótkizý qabileti shekteýli, sondyqtan qosymsha qabyldaý oryndary paida bolady. Sonymen qatar, biz tirkelý baǵanasynan geitke deiingi ortasha ýaqytty 15 minýttan 3-4 minýtqa deiin qysqartýdy josparlap otyrmyz", – dep túsindirdi Al Er Týnga Ersoi.
Budan bólek, jolaýshylardyń jailylyǵy úshin jańa terminalda ár qabatta ana men bala bólmeleri, múmkindigi shekteýli jandarǵa qajetti jailylyq, balalarǵa arnalǵan oiyn alańy, sondai-aq demalys bólmeleri, so-working-aimaqtar, VR-bólme, úi janýarlaryna arnalǵan dárethana kózdeletin bolady.
Sondai-aq, munda Azamattyq aviatsiianyń damýyna jáne Almaty áýejaiyna arnalǵan murajai ashylady.
Qoldanystaǵy terminaldy jańartýdy eskere otyryp, Almaty halyqaralyq áýejaiynyń jalpy ótkizý qabileti jylyna 14 mln jolaýshyǵa deiin ulǵaiady, al jańa terminaldyń teleskopiialyq traptary borttyń kólemine bailanysty bir ýaqytta jeti ushaqqa deiin qabyldai alady.
