Almaty áýejaiynyń prezidenti Bolat Erjanov ushaq apatyna bailanysty oiyn aitty, dep habarlaidy QazAqparat.
«Bek Air áýe kompaniiasynyń Almaty-Nur-Sultan baǵytyndaǵy №2100 reisin oryndaǵan Foker-100 ushaǵy apatqa ushyrady. Áýe kemesiniń komandiri Muratbaev, ekinshi ushqysh Moldaǵulov, 3 bort-serik bolǵan. Barlyǵy 5 ekipaj múshesi boldy. Bortta 93 jolaýshy otyrǵan. Onyń ishinde 85 eresek adam, 5 úlken bala, 3 kishkentai bala. Bortta 603 keli bagaj, 613 keli júk bolǵan», - dedi Bolat Erjanov.
Onyń aitýynsha, reiske tirkeý 5:35-te bastalǵan.
«Ushaq 7:21-de áýege kóterildi. 7:25-te qaýip dabyly qaǵyldy. 7:40-ta ushaq radardan joǵalyp ketkeni týraly habarlama tústi. Oqiǵa ornyna birinshi áýejai qyzmetkerleri jetti», - dedi áýejai basshysy.
Aita keteiik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia ushyp shyqty. Osy apatqa qatysty shuǵyl jeli iske qosylǵan.
QR Prezidenti Qasym-Jomart Toqaev ushaq apatyna kináliler zańǵa sáikes qatań jazalanatynyn málimdedi. Elbasy Nur-Sultan Nazarbaev jolaýshylar ushaǵynyń apatqa ushyraýyna bailanysty kóńil aitty.
