Almatyda metropolitenniń birinshi jelisiniń ekinshi kezeńindegi úshinshi iske qosý kesheniniń qurylysy jalǵasyp jatyr. Qala ákimi Darhan Satybaldy jumys sapary aiasynda «Qalqaman» metro beketi men oǵan jalǵasatyn tonnelderdegi jumys barysymen tanysty.
Sol jaq aralyq tonnelde «B. Momyshuly» beketinen salynyp jatqan «Qalqaman» beketine deiingi aralyqta relster tóseý tolyq aiaqtaldy. Tonnel ishinde elektrmen jabdyqtaý kabelderi, sý qubyry jáne drenaj júiesi tartyldy, injenerlik jabdyqqa arnalǵan kronshteinder ornatyldy. Endigi kezeńde beinebaqylaý, dybystyq habarlaý, órt jáne qaýipsizdik dabyl berý júielerin ornatý josparlanǵan. Sonymen qatar oń jaq peregondyq tonneldi qazý jumystary jalǵasýda: jalpy uzyndyǵy 1 593 metrdiń 1 285 metri júrgizildi, 308 metri qaldy.
Stantsiianyń ózinde monolittik qurylymdar aiaqtalýǵa jaqyn, keri topyraq toltyrý júrgizilip jatyr. Ishki keńistikte árleý jumystary, injenerlik kommýnikatsiialar tartý jáne jabdyqty montajdaýǵa daiyndyq júrip jatyr. Barlyq óndiristik operatsiialar táýlik boiy atqarylady. Jalpy nysanda 478-den astam maman eńbek etýde: onyń 149-y jerasty jumystarynda, 329-y – ashyq alańdarda.
Darhan Satybaldy bekitilgen merzimdi qatań saqtaýdyń jáne jumystardyń joǵary sapasyn qamtamasyz etýdiń mańyzdylyǵyn atap ótti. Ákimniń aitýynsha, «Qalqaman» metro beketiniń qurylysy Almatynyń kólik júiesi úshin strategiialyq mánge ie jáne metronyń batys baǵyttardaǵy qoljetimdiligin aitarlyqtai arttyrady.
Qurylys-montaj jumystary 2026 jyldyń birinshi jartysynyń sońyna deiin aiaqtaý josparlanǵan.
