Almaty ákimi Baqytjan Saǵyntaev jumys sapary kezinde turǵyndary birneshe márte kómek suraǵan Medeý aýdanynyń túitkildi ýchaskelerinde boldy, dep habarlaidy "Ult aqparat".
«Dýman» yqshamaýdanynda 18,5 shaqyrym sýmen jabdyqtaý jáne 26 shaqyrym sý burý jelileriniń qurylysy aiaqtalýda. Qoǵamdyq kólik baǵyttary ótetin 6 kóshede — Han Táńiri, Qazyǵurt, Qarqaraly, Aqmeshit, Borabai, Bolashaqta 3,7 shaqyrym jolda kúrdeli jóndeý jumystary bastaldy. Bul jumystardy qarasha aiynda aiaqtaý josparlanǵan»,– dep jazdy Baqytjan Saǵyntaev Instagram paraqshasynda.
Sonymen qatar, ol kelesi jyly qalǵan 53 kósheniń joly jóndeletinin atap ótti.
«Muztaý» yqshamaýdanynda injenerlik jelilerdi salýǵa bailanysty qazylǵan jol jabynyn tez arada qalpyna keltirýdi tapsyrdym. Býtakovka shatqalyna aparatyn joldyń uzyndyǵy - 4,6 shaqyrym. Bul jol týristik baǵyttardyń qataryna kiredi», - dep jazdy B. Saǵyntaev.
Taǵy bir máseleniń sheshimi jaýyn-shashynnan kóshkin júrýi yqtimal «Kompot» dep atalatyn massivtiń turǵyndaryn qorǵaýǵa múmkindik berdi. Kókkinaki kóshesindegi qaýipti aimaqta 42 úi bolǵan.
Biyl jyldyń sońyna deiin jalpy uzyndyǵy 350 shaqyrym bolatyn betkeilerdi nyǵaitý josparlanǵan. Almalyq kóshesi boiyndaǵy eńisti nyǵaityp, aryq júiesin ornatý jumystary aiaqtaldy, mundaǵy qaýipti aimaqta 60 úi boldy.
Eske salaiyq, taý bókterinde turatyn turǵyndar kóshkin qaýpinen qorqyp, Almaty qalasynyń ákimi B. Saǵyntaevtan kómek suraǵan edi.
Onyń tapsyrmasy boiynsha qarajat bólindi jáne betkeilerdi nyǵaitýǵa múmkindik beretin gabion qurylymdarynyń qurylysy júzege asty.
Sonymen qatar, jańbyr sýyn aǵyzatyn aryqtar salynyp jatyr.
