Búgin tańerteń Almaty ákimi Baqytjan Saǵyntaev ushaq apaty bolǵan jerge bardy, dep habarlaidy "Ult aqparat".
Bul týraly ákimniń baspasóz hatshysy Áset Muqajanov Instagram paraqshasynda jazdy.
«Bek Eir» áýe kompaniiasyna tiesili «Fokker-100» ushaǵynyń qulaǵan jerine qala ákimi Baqytjan Saǵyntaev bardy. Qala basshysy izdestirý qutqarý jumystaryn baqylady. Odan shyǵyp Almaty áýejaiynyń terminalyn aralap shyqty. Sodan keiin №4 aýrýhana men Shuǵyl meditsinalyq kómek kórsetý aýrýhanasyna, Balalarǵa shuǵyl meditsinalyq kómek kórsetý ortalyǵyna baryp, zardap shekken adamdardyń halyn bildi. Qala basshysy qaza bolǵandardyń otbasyna qaiǵysyna otaqtasyp kóńil aitty», - dedi Áset Muqajanov.
Aita ketý kerek, búgin Almaty — Nur Sultan baǵytyndaǵy Bek Eir ushaǵy Almaty oblysy Álmerek aýylynda apatqa ushyrady.
Aldyn ala aqparat boiynsha bortta 93 jolaýshy, 5 ekipaj múshesi bolǵan.
Qalalyq ákimdik taratqan aqparat boiynsha, kezekshi pýltine tańǵy 7:43-te qońyraý túsken. Oqiǵa ornyna Almaty oblysynyń Ile jáne Talǵar aýdanynan 16 jedel járdem brigadasy shyqty. Almaty qalasynan 35 jedel járdem brigadasy keldi. 2 neirohirýrgiialyq briagada jolǵa shyqty.
Almaty oblystyq kóp profildi aýrýhanasyna asa aýyr haldegi 5 patsient jetkizildi.
Balalarǵa shuǵyl meditsinalyq kómek kórsetý ortalyǵyna 8 bala jetkizildi. Olardyń barlyǵy túrli jaraqat alǵan. №4 qalalyq klinikalyq aýrýhanaǵa 17 aadam asa aýyr jaraqatpen jetkizildi.
Qazir bul jumystarǵa psihologtar da jumyldyryldy.
