Almaty qalalyq Josparlaý jáne ýrbanistika basqarmasynyń basshysy Almashan Ahmetjanov teleortalyq – apparattyq stýdiia keshenin (ASK-2 ) qaita qalpyna keltirý jumystary týraly aityp berdi, dep habarlaidy QazAqparat.
«Negizi ǵimarat kelbeti aitarlyqtai ózgergen joq. Tek áinektiń túsi sál qońyrlaý bolyp shyqty. Qazir áinek jyltyrap tur, kúnge shaǵylysqan kezde kózge áser etedi. Men bul ǵimaratty jaqsy bilemin. Onyń qalai salynǵanyn, qalai paidalanýǵa berilgenin, qalai jumys isteitinin bárin jaqsy bilemin. Eger bul ǵimarat qoǵam úshin ashyq bolatyn bolsa, shynymen de jaqsy bolar edi», - deidi basqarma basshysy Almashan Ahmetjanov.
Onyń aitýynsha, qaita qalpyna keltirý jumystarynan keiin de, sáýlet elementteri ózgergen joq jáne arhitektýralyq syzba boiynsha ǵimarattyń qasbeti burynǵydai qalpyna keltirildi. Onyń beinesi, stili tipti ólshemderiniń pishini de bastapqy túrinde saqtalǵan. Bul joba osy ǵimarattyń avtorymen birge jasaldy.
«Búgingi kúni apparattyq stýdiia kesheni (ASK-2 ) jobaǵa sáikes, bastapqy qalpyna keltirildi. Biz 100 paiyz arhitektýralyq qurylymdy saqtadyq», - dep tolyqtyrdy A. Ahmetjanov.
«Teleortalyq» Timiriazev jáne Jeltoqsan kósheleriniń qiylysynda ornalasqan. Bul - Almaty úshin biregei nysan. Televiziia úshin apparattyq stýdiia keshenin salý týraly sheshim 1970 jyly qabyldanǵan bolatyn.
