Almaty ákimdigi almatylyqtardy KVI-ge qarsy kúres sharalaryn kúsheitýge shaqyrdy, dep habarlaidy "Ult aqparat".
Osy ýaqytqa deiin Almatyda koronavirýs infektsiiasyn 19 980 adam juqtyryp alsa, ótken táýlikte megapolis boiynsha 122 naýqastan PTR testileýdiń oń nátijesi anyqtaldy. 2020 jylǵy jeltoqsan aiynyń birinshi onkúndigimen salystyrǵanda koronavirýstyq infektsiia boiynsha syrqattaný deńgei 1,7 ese ósken
Almaty ákimdigi qala turǵyndary men qonaqtaryn karantin sharalary - áleýmettik qashyqtyqty saqtap, maska rejiminiń saqtalýyn kúsheitýge, sondai-aq múmkindiginshe jabyq úi-jailarda uzaq ýaqyt bolýdan bas tartýǵa shaqyrady.
Almaty qalasy Sanitarlyq-epidemiologiialyq baqylaý departamentiniń málimeti boiynsha, aýrýdyń eń kóp taralýy 20-39 jas aralyǵynda – 35% jáne 40-59 jas aralyǵynda - 31% baiqalady. Bul jańa jyl aldyndaǵy jáne kelesi demalys kúnderi korporativtik keshterdi ótkizýmen jáne saýda nysandaryna barýmen bailanysty.
Qoǵamdyq oryndardyń ishinde (saýda, qoǵamdyq tamaqtaný nysandary) – 41%, otbasylardaǵy bailanys – 27% jáne qoǵamdyq kólik – 21% quraidy.
Osyǵan bailanysty almatylyqtarǵa saqtyq sharalaryn qatań saqtaý, múmkindiginshe adamdar kóp jinalatyn oryndardan aýlaq bolý, betperdelerdi durys paidalaný, jeke gigienany saqtaý sekildi eskertýler jasalady. Sondai-aq zeinetkerlerdiń turǵyn úiden shyǵýyn shekteý qajet. Respiratorlyq infektsiialardyń belgileri paida bolǵan jaǵdaida jeke bólmede oqshaýlanyp, ýchaskelik dárigerdi úige shaqyrý jáne koronavirýstyq infektsiia diagnozy qoiylǵan kezde jaqyn adamdarynyń, týystary men kórshileriniń juqtyrýyn boldyrmaý úshin karantindik statsionarǵa jatqyzýdan bas tartpaý kerek.
Aita ketý kerek, infektsiianyń syrttan kelý jaǵdailarynyń tirkelýi jalǵasýda. 06.10.2020 jylǵy kezeńnen beri koronavirýstyq infektsiianyń 77 jaǵdaiy tirkeldi. Ótken táýlikte Dýbai – Almaty reisimen kelgen jolaýshylarda koronavirýs infektsiiasynyń 2 jaǵdaiy anyqtaldy.
Sonymen birge, álemde COVID-19 jaǵdaiy ýshyǵa tústi. Elder aldyn alý sharalaryn kúsheitýde. Mysaly, Niderlandyda shekteýlerdi 9 aqpanǵa deiin uzartty. Italiianyń densaýlyq saqtaý ministri Roberto Sperantsa Parlamentke tótenshe jaǵdaidy 30 sáýirge deiin uzartý týraly habarlady. Shveitsariia koronavirýspen kúresý úshin karantindi odan ári kúsheitip, 22 qańtardyń ornyna ony qystyń sońyna deiin jalǵastyrdy.
