Almaty qalasynyń ortalyq klinikalyq aýrýhanasynyń bas dárigeri Almaz Djývashev óz erkimen qyzmetinen ketti. Bul aqparatty qalalyq qoǵamdyq densaýlyq saqtaý basqarmasyna silteme jasaǵan Informburo.kz saity habarlady.
Almaty qalasynyń bas sanitar dárigeri Aizat Moldaǵasymovanyń habarlaýynsha, meditsinalyq mekemede 182 qyzmetkerden koronavirýs tabylǵan.
"Basshysy qyzmetten ketti, onyń qaramaǵyndaǵy shamamen 200 adam aýyryp jatyr. Ol uiymdastyrý isinde ketken qatelikterin bilgennen keiin óz erkimen qyzmetinen ketý týraly ótinish jazdy" dedi qalalyq qoǵamdyq densaýlyq saqtaý basqarmasynyń basshysy Tileýhan Ábildaev.
Saittyń jazýynsha, karantinge jatqyzylǵan ortalyq aýrýhana dárigerleri video túsirip, Almaz Djývashevti qaitarýdy talap etken. Ázirge Djývashev túsinikteme bergen joq.
Densaýlyq saqtaý ministri Eljan Birtanov 15 sáýirge qaraǵan túni Facebook jelisinde Almaty ortalyq klinikalyq aýrýhanasyndaǵy jaǵdaiǵa bailanysty pikirin aitty. Ol ministrlik ókilderiniń karantinge jatqyzylǵan aýrýhana qyzmetkerlerimen kezdesý ótkizetinin aityp, "barlyq másele emotsiiasyz zań boiynsha sheshiledi" dedi.
Almaz Djývashev 2019 jyly mamyr aiynda ortalyq klinikalyq aýrýhanasynyń direktory bolyp taǵaiyndalǵan. Qazir aýrýhana basshysynyń ýaqytsha mindetin meditsinalyq mekemeni 2012-2017 jyldary basqarǵan Marat Abdýllaev atqarady.
