«COVID-19 infektsiiasynan qorǵaný úshin alkogoldi kóp ishý kerek». Facebook áleýmettik jelisinde osyndai usynys jariialandy. Post avtorynyń sózinshe, syra, sharap jáne spirttik tunbalar men balzamdar aýrýǵa qarsy turýǵa kómektesedi. Shyndyǵynda, buǵan eshqandai ǵylymi dálel joq, dep jazady stopfake.kz.
Alkogol aǵzany ishten «zararsyzdandyrady», barlyq virýstardy óltiredi degen mif burynnan bar jáne birneshe ret teriske shyǵarylǵan bolatyn. Biraq COVID-19 pandemiiasy bastalǵaly ol qaita taralýda. Aýrýdyń aldyn alýdyń bul ádisin jaqtaýshylar, ǵalymdar alkogoldiń virýstardy óltire alatyn qabiletin dáleldegen dep málimdeýde.
Quramynda alkogol bar zattardyń virýstarǵa jáne SARS-CoV-2 koronavirýsyna áseri týraly zertteýler bar. Alaida, olar alkogoldi ishý emes, qoldar men zattardyń betterin zararsyzdandyrý úshin ǵana qoldanýǵa qatysty.
DDSU saitynda COVID-19 kúres aiasynda alkogol ishýdiń paidasy týraly mif joqqa shyǵarylǵan. Sarapshylar quramynda spirt bar eritindiler tek qol men zattardyń betterin dezinfektsiialaý úshin ǵana tiimdi ekenin atap ótti. Ony ishý qajet emes.
Sonymen qatar, ózderin virýstan qorǵaý úshin kontrfaktili ónim tutynǵan adamdar ýlanyp, qaitys bolǵan jaǵdailar da tirkelgen.
Ǵalymdar alkogoldi shamadan tys tutyný densaýlyqqa, onyń ishinde immýndyq júiege aitarlyqtai ziian keltirýi múmkin ekendigin aitady. Osylaisha, virýs juqqanda aǵza oǵan tótep bere almaýy múmkin.
