«Nur Otan» partiiasy Tóraǵasynyń birinshi orynbasary Baýyrjan Baibek Facebook jelisindegi paraqshasynda partiianyń aldaǵy kezeńge arnalǵan josparlarymen bólisti.
Onyń aitýynsha, 1 naýryzda «Nur Otan» partiiasynyń qurylǵanyna 22 jyl tolady. Osynaý aitýly kúnniń qarsańynda elimiz boiynsha myńnan astam belsendi azamat partiia qataryna qosyldy. Olardyń arasynda azamattyq qoǵam, bilim berý, densaýlyq saqtaý, ónerkásip, mádeniet pen sport salasynyń ókilderi bar.
«Elbasy, partiia Lideri Nursultan Nazarbaev aitqandai, nurotandyqtardyń basty printsipteri – jaýapkershilik, komandalyq rýh jáne partiia idealdary men qundylyqtaryna berik bolý. Biz Jarǵy talaptaryna sáikes partiialyqtardyń sapalyq quramyn jaqsartý boiynsha jumysty jalǵastyramyz. Sondai-aq partiia jaqtastarynyń institýty keńeitiledi», - dedi ol.
Baýyrjan Baibek atap ótkendei, aldaǵy elektorataralyq kezeńde Elbasy «Nur Otan»-nyń jumysyn tolyqtai qaita qurýdy jáne sailaýaldy ýádelerdiń iske asyrylýyna júieli baqylaýdy qamtamasyz etýdi tapsyrdy.
«Partiia Lideriniń fraktsiialar jumysyn kúsheitý jónindegi tapsyrmasyna sáikes bizdiń depýtattardyń qoǵamdyq reitingi engiziledi. Partiialyq tizimderde rezervte turǵan 2 myńdai azamat, sarapshylar men úkimettik emes uiymdar tartyla otyryp, partiia qoǵamdyq keńesteriniń jumysy júieli túrde qaita qurylymdalatyn bolady», - dep málimdedi partiia Tóraǵasynyń birinshi orynbasary.
Sondai-aq, ol óz jazbasynda «Elektrondy partiia» jobasyn jandandyrý aiasynda Úkimetpen birlesip ár óńir, qala jáne aýdan boiynsha sailaýaldy baǵdarlamalar sheńberindegi jol kartalaryn iske asyrýǵa monitoring júrgizý úshin tsifrlyq platforma ázirlenetinin aitty.
«Partiia Lideri aitqandai, «Nur Otan»-nyń apparaty pandemiia kezeńinde turǵyndarmen naqty jumys júrgizýge baǵdarlanýy tiis. El kólemindegi 234 qoǵamdyq qabyldaý bólmesi ózara áreket jasaýdyń proaktivti formatyna kóshýi tiis. Onyń ishinde áleýmettik jeliler de qamtylýy qajet. Osyǵan bailanysty alǵa qoiylǵan jańa mindetter eskerile otyryp, qoǵam qairatkeri Áliia Sadyrbaeva partiianyń Respýblikalyq qoǵamdyq qabyldaý bólmesiniń basshysy bolyp taǵaiyndaldy. Onyń zań jáne qoǵamdyq uiymdar salasynda 20 jyldan astam jumys tájiribesi bar», - dep jazdy Baýyrjan Baibek.
Sonymen qatar, sońǵy jylda bizge 393 myńnan astam ótinish kelip túskeni aityldy. Bul – 2019 jylmen salystyrǵanda 2 ese kóp. 5 jyl ishinde partiiaǵa 1,2 mln. adam júginse, onyń ishinde 423 myńnan astamy – onlain-formatta. Olardyń 92%-i oń sheshimin tapty, tegin konsýltativtik, quqyqtyq jáne ózge de kómek kórsetildi.
