Foto: instagram.com/aliya_nazarbayeva_official/
Bas prokýratýraǵa "ROP" isi boiynsha Áliia Nazarbaevaǵa qatysty depýtattardan eshqandai ótinish túspegen. Bul týraly Bas prokýrordyń orynbasary Áset Shyńdaliev málimdedi, dep habarlaidy Sputnik Qazaqstan.
"Mende Áliia Nazarbaevaǵa qatysty qylmystyq qýdalaý nemese is qozǵaý týraly málimet joq. Ózderińiz biletindei, ROP boiynsha úkim shyqty. Jaqynda qalalyq sot úkimdi zańdy kúshinde qaldyrdy. Al jańaǵy aityp otyrǵan kisi boiynsha mende basqa málimet joq", - deidi Shyńdaliev Májiliste jýrnalister suraǵyna jaýap berip.
Onyń aitýynsha, bas prokýratýraǵa Nazarbaevaǵa qatysty eshqandai ótinish túspegen.
"Eger qandai da bir qylmys quramy, qandai da bir aqparat bolsa, qylmystyq qýdalaýmen ainalysatyn tiisti memlekettik organdar sheshim qabyldaýǵa tiis. Bizde mundai birneshe organ bar: Sybailas jemqorlyqqa qarsy qyzmet, Ekonomikalyq tergeý qyzmeti, Ishki ister ministrligi. Eger aqparat tússe jáne qandai da bir dálelder bolsa, olar sheshim qabyldaýy kerek. Ázirge mende mundai aqparat joq", - dep túsindirdi Bas prokýrordyń orynbasary.
Buǵan deiin Májilis depýtaty Erlan Saiyrov "AMANAT" partiiasynyń janyndaǵy sybailas jemqorlyqqa qarsy is-qimyl jónindegi respýblikalyq keńes otyrysynda kýágerler ROP operatorynyń túpki benefitsiary Áliia Nazarbaeva dep kórsetkenin málimdedi.
"Barshamyzǵa belgili, jaqynda ROP dep atalatyn uiym basshylarynyń birqatary qylmystyq jaýapqa tartyldy. Sot barysynda kóptegen kýáger jemqorlyq jolmen alynǵan qarjynyń túpki benefitsiary Áliia Nazarbaeva dep kórsetti", - degen edi Erlan Saiyrov.
Májilismenniń aitýynsha, sot ta, bas prokýratýra ókilderi de sot protsesinde kýágerlerdiń ýájine nazar aýdarmaǵan.
Saiyrov azamattardyń ýájin mindetti túrde Bas prokýratýraǵa jetkizetinin jáne bul másele keńestiń baqylaýynda bolatynyn aitty.
