Foto: Instagram/janibek_alimkhanuly
Qazaqstannyń kásipqoi boks federatsiiasy WBO jáne IBF tujyrymdary boiynsha álem chempiony Jánibek Álimhanulyna qatysty doping isi boiynsha tártiptik tyńdaý ótetin kúndi resmi túrde jariialady. Federatsiianyń málimetinshe, is 19 qańtarda qaralady, dep habarlaidy Ult.kz.
Federatsiia prezidenti Rahymjan Erdenbekov bul aqparatty senbi, 10 qańtar kúni áleýmettik jelidegi paraqshasynda málimdedi. Onyń aitýynsha, tyńdaý qoldanystaǵy reglamentterge, protsestik ádildik qaǵidattaryna, kinásizdik prezýmptsiiasyna jáne halyqaralyq antidopingtik standarttarǵa tolyq sáikes júrgiziledi.
Sondai-aq federatsiia túpkilikti sheshim shyqqanǵa deiin ártúrli alypqashpa áńgimeler men kópshilik aldynda jasalatyn qorytyndylardy orynsyz dep sanaitynyn atap ótti.
«Qazaqstannyń kásipqoi boks federatsiiasy sporttyń tazalyǵyn saqtaýdy, sportshylardyń quqyqtaryn qorǵaýdy jáne federatsiianyń institýtsionaldyq táýelsizdigin júieli túrde qamtamasyz etip keledi», – delingen resmi málimdemede.
Rahymjan Erdenbekov istiń ári qaraiǵy barlyq protsestik qadamdary týraly qosymsha aqparat resmi túrde jariialanatynyn jetkizdi.
Aita keteiik, buǵan deiin federatsiia basshysy Jánibek Álimhanulynyń doping-baqylaýyna qatysty B synamasyn ashý jáne taldaý rásimi júrgiziletinin habarlaǵan bolatyn. Onyń sózinshe, bul kezeń – istiń quqyqtyq baǵasy men sportshynyń bolashaq mansabyna tikelei áser etetin mańyzdy saty. B synamasynyń resmi qorytyndysy shyqqanǵa deiin qazaqstandyq boksshy kinásiz dep esepteledi.
