Qostanai oblysynda alimentten qashqan er adam 300 saǵattyq qoǵamdyq jumysqa jegildi, dep habarlaidy "Ult aqparat".
Qostanai oblysy Qylmystyq-atqarý júiesi departamenti baspasóz qyzmetiniń málimetinshe, er adam ken ornynda vahtalyq ádispen jumys istep kelgen. Turaqty tabysy bolsa da, ol únemi aliment tóleýden jaltarǵan.
«Nátijesinde borysh somasy 600 myń teńgeden asty. Sot talqylaýy kezinde ol aqshasyn tólei almaitynyn aitty. Qylmystyq is qozǵaldy, endi er adam jergilikti eldi mekendi abattandyrý jumystaryna jegiledi», delingen habarlamada.
Iývenaldy sot aliment tóleýden qasaqana jaltarǵan ákeni kináli dep taýyp, 300 saǵattyq qoǵamdyq jumysqa tartý týraly úkim shyǵardy.
