Premer-ministrdiń birinshi orynbasary Álihan Smaiylov taýarlardy tańbalaý arqyly kontrafakt ónimderi anyqtalyp, adal básekelestik úshin teń jaǵdai jasalatynyn málim etti, dep habarlaidy QazAqparat.
«Taýarlardy tańbalaý jáne qadaǵalaý júiesin engizý - Eýraziialyq ekonomikalyq odaqtyń kún tártibindegi eń ózekti máseleleriniń biri. Resei tarapy tańbalaýdy óz aýmaǵynda belsendi qoldanady. Bul taýarlardyń keń spektri – temeki, aiaq kiim, dári-dármekter, fotoapparattar, avtoshinalar, jeńil ónerkásip taýarlary, iis sýlar, sút ónimderi. Tańbalaý arqyly kontrafakt ónimdi anyqtaý adal básekelestik úshin teń jaǵdai jasaýǵa múmkindik beredi. Tańbalaýdy engizý boiynsha kósh sońynda qalýǵa bolmaidy», - dedi Álihan Smaiylov Úkimet otyrysynda.
Onyń aitýynsha bul kóshten qalý ónerkásip salalary úshin úlken qaýip týdyrady. Reseilik naryqqa arnalǵan tańbalanbaǵan ónimder bizdiń naryqqa tómen baǵamen kóp kólemde kelýi múmkin.
«Mundai jaǵdai ishki naryqta qazaqstandyq óndirýshilerdi óz naryǵynan yǵystyryp shyǵarý qaýipi bar. Jáne Eýraziialyq ekonomikalyq odaqtyń basqa elderiniń naryqtaryna eksporttaý máselesi qiyndaidy. Osyǵan bailanysty, elimizde taýarlar nomenklatýrasyn keńeitýdiń túsinikti algoritmimen tańbalaýdy engizý jónindegi jumysty belsendi júrgizý kerek», - dedi ol.
