QR Premer-Ministri Álihan Smaiylov Reformalar jónindegi joǵary keńes tóraǵasynyń orynbasary Ser Sýma Chakrabartimen kezdesý ótkizdi, onda Qazaqstannyń makroekonomikalyq damýy, «Astana» halyqaralyq qarjy ortalyǵynyń qyzmeti, sondai-aq investitsiialar tartý máseleleri talqylandy, dep habarlaidy "Ult aqparat" primeminister.kz saityna silteme jasap.
Keńeste qazirgi ýaqytta jahandyq jáne óńirlik logistikalyq tizbekterdiń buzylýy, álemdik qarjy jáne shikizat naryqtarynyń qubylýy, infliatsiialyq qysymnyń kúsheiip bara jatqany atap ótildi.
Yqtimal syn-tegeýrinderdi jeńildetý úshin QR Úkimeti qarjy júiesiniń turaqtylyǵyn qamtamasyz etýge, infliatsiiany baqylaý men tómendetýge, syrtqy saýda qyzmetin yntalandyrýǵa, ekonomika salalaryn qoldaýǵa jáne investitsiia tartýǵa baǵyttalǵan daǵdarysqa qarsy sharalardy qabyldap jatyr.
Kúrdeli syrtqy ekonomikalyq jaǵdaidyń saldaryn jeńildetý maqsatynda ekonomikanyń naqty sektory úshin 2022 jylǵa 1,2 trln teńge bólý kózdelgen. Bul qarajat óńdeý ónerkásibin qoldaýǵa, AÓK-ti, kúre joldardy damytýǵa, kásipkerlerdiń nesieleri boiynsha syiaqy mólsherlemesin sýbsidiialaýǵa, kepildendirýge jáne taǵy basqasyna baǵyttalatyn bolady.
Ser Sýma Chakrabarti bulardyń bári tiimdi ári ýaqytyly sharalar ekenin atap ótti. Onyń aitýynsha, qazirgi trendterdi ǵana emes, olardyń uzaqqa sozylatyn saldaryn da eskerý mańyzdy.
Sonymen qatar keńes barysynda AHQO-nyń 27-29 maýsym aralyǵynda aimaqtaǵy eń iri qarjy konferentsiialardyń biri – Astana Finance Days-di ótkizý josparlary talqylandy. Onyń aiasynda kórnekti halyqaralyq sarapshylardyń qatysýymen Qazaqstannyń jańa ekonomikalyq reformalaryn, investitsiialyq múmkindikteri men áleýetti ósý núktelerin talqylaý josparlanǵan.
Budan bólek kezdesýde Qazaqstanǵa tikelei sheteldik investitsiialardy tartý máselesi talqylandy. Máselen, 2021 jyldyń qorytyndysy boiynsha respýblikanyń investitsiialar tartýdyń «pandemiiaǵa deiingi» deńgeiine oralǵany atap ótildi. Ótken jyly quny 3,6 mlrd dollar bolatyn 44 jańa investitsiialyq joba paidalanýǵa berildi.
Qazirgi ýaqytta 54 mlrd dollarǵa otandyq jáne sheteldik investorlardyń iske asyrylǵan jáne josparlanǵan 761 jobasynyń pýly ázirlenip, jariialandy.
«Qazaqstannyń investitsiialyq tartymdylyǵyn arttyrý úshin Úkimet Investitsiialyq saiasattyń 2026 jylǵa deiingi jańa tujyrymdamasyn bekitý boiynsha jumys júrgizip jatyr. Jahandyq trendterdi eskere otyryp, tereń óńdeý ónerkásibine, agroónerkásiptik keshenge, farmatsevtikaǵa jáne kólik-logistika infraqurylymyna investitsiialar tartý jumysy jalǵasatyn bolady», — dedi kezdesýdi qorytyndylaǵan QR Premer-Ministri.
