Foto: primeminister.kz
Álihan Smaiylov Premer-ministr qyzmetine qaita taǵaiyndaldy, - dep habarlaidy "Ult aqparat".
29 naýryzda Prezident Parlament palatalarynyń birlesken otyrysynda Premer-ministr kandidatýrasyn sailaýda jeńiske jetken partiia usynatynyn, jaýapkershilik te sol partiiaǵa júkteletinin málimdegen bolatyn. Amanat partiiasy kóp oilanǵan joq. Búgin Májilis spikeri, partiia tóraǵasy Erlan Qoshanov Toqaevtyń qabyldaýynda boldy. Amanattyqtar Úkimet basshysy laýazymyna Álihan Smaiylovty laiyq kórgen.
Osydan keiin Memleket basshysy usynylǵan kandidatýrany Májilistegi partiialardyń basqa fraktsiialarymen talqylady.
"Ata zańymyzdyń 44-babyna sáikes, Premer-ministr laýazymyna Álihan Ashanuly Smaiylovtyń kandidatýrasyn usynamyn. Barshańyz bul azamatty jaqsy tanisyzdar. Bilikti ári tájiribeli maman. Jumysqa adal, eńbekqor adam. Ol Úkimettiń aldynda turǵan mindetterdi jaqsy biledi. Oǵan jańa Úkimettiń tizginin senip tapsyrýǵa bolady dep sanaimyn", - dedi Toqaev Májilistiń jalpy otyrysynda.
Májilis depýtattary Úkimet basshysy kandidatýrasyn talqylaǵannan keiin «Qazaqstan Respýblikasynyń Prezidentine Qazaqstan Respýblikasy Premer-Ministri laýazymyna Smaiylov Álihan Ashanulyn taǵaiyndaýǵa kelisim berilsin» degen qaýly jobasyna daýys berdi. Daýys berý barysynda jalpy otyrysqa qatysqan 97 depýtattyń 82-si onyń kandidatýrasyn qoldady. 7 depýtat qarsy shyǵyp, 8 depýtat qalys qaldy.
Keiin Memleket basshysy Qasym-Jomart Toqaev Álihan Ashanuly Smaiylovty Qazaqstan Respýblikasynyń Premer-Ministri laýazymyna taǵaiyndaý týraly Jarlyqqa qol qoidy.
"Álihan Ashanuly Smaiylov Qazaqstan Respýblikasynyń Premer-ministri laýazymyna taǵaiyndalsyn", - delingen Jarlyqta.
***
Smaiylov Álihan Ashanuly 1972 jyly Almaty qalasynda dúniege kelgen.
1994 jyly ál-Farabi atyndaǵy Qazaq memlekettik ulttyq ýniversitetin «qoldanbaly matematika» mamandyǵy boiynsha támamdaǵan.
1996 jyly — QR Prezidenti janyndaǵy Qazaqstan menedjment, ekonomika jáne boljamdaý institýtynyń memlekettik basqarý magistri dárejesine ie boldy.
1993–1999 jyldary – «A-Invest» investitsiialyq-jekeshelendirý qorynyń bas mamany; bólim basshysynyń orynbasary, QR Ulttyq statistika agenttiginiń basqarma basshysy; QR Statistikalyq josparlaý jáne reformalar jónindegi agenttiginiń Statistika jáne taldaý komiteti tóraǵasynyń orynbasary; bas sarapshy, ekonomika sektorynyń meńgerýshisi, QR Prezidenti Ákimshiliginiń memlekettik inspektory bolyp qyzmet atqarǵan.
1999–2003 jyldary — QR Statistika agenttiginiń tóraǵasy.
2003–2006 jyldary — QR syrtqy ister vitse-ministri, «Eksporttyq nesieler men investitsiialardy saqtandyrý jónindegi memlekettik saqtandyrý kompaniiasy» AQ basqarma tóraǵasy.
2006–2009 jyldary — QR qarjy vitse-ministri, «QazAgro» UBH prezidenti.
2009–2014 jyldary — QR Statistika agenttiginiń tóraǵasy.
2014–2015 jyldary — QR Ulttyq ekonomika ministrliginiń Statistika jónindegi komitetiniń tóraǵasy.
2015–2018 jyldary — QR Prezidentiniń kómekshisi.
2018 jylǵy qyrkúiekten bastap 2019 jylǵy aqpanǵa deiin — Qarjy ministri.
2019 jylǵy 25 aqpanda Prezident Jarlyǵymen Premer-Ministrdiń birinshi orynbasary – Qarjy ministri qyzmetine taǵaiyndaldy. 2021 jyly 18 qańtarda QR Prezidentiniń Jarlyǵymen osy qyzmetine qaita taǵaiyndaldy.
2022 jylǵy 11 qańtarda QR Prezidentiniń Jarlyǵymen QR Premer-Ministri laýazymyna taǵaiyndaldy.
